La Regenza ha approvà la dumonda da las vischnancas da Silvaplauna e Surses concernent l'integraziun dal «Trail dal Güglia» en la rait chantunala da vias da velos dal traffic da temp liber. Uschia po vegnir realisada ina nova senda da mountainbikes e da viandar che collia l'Engiadin'Ota e la Val Surses sur il Pass dal Güglia. Ils custs totals per construir la nova senda da mountainbikes e da viandar èn budgetads cun var 2,31 milliuns francs. Ultra da quai resultan custs da circa 15 100 francs per signalisar ils novs trajects. Il chantun surpiglia 60 pertschient dals custs imputabels per la nova senda, vul dir maximalmain circa 1,39 milliuns francs, sco er 50 pertschient dals custs imputabels per las signalisaziuns.

Il «Trail dal Güglia» è in project exemplaric. La nova senda planisada tranter Silvaplauna e Beiva augmenta la qualitad da la purschida e da l'aventura dad omaduas varts dal pass. Suenter ch'il trail dal Güglia è construì a fin, vegn la ruta naziunala da mountainbikes nr. 1 («Alpine Bike»), che maina en pliras etappas da Scuol a Leysin (VD), a manar da nov sur il Pass dal Güglia e betg pli sur ils Pass dal Malögia e dal Set. Uschia pon ins porscher a las ciclistas ed als ciclists da muntogna ina ruta bler pli attractiva ch'è charrabla senza interrupziuns.

© WOM Medien / Jens Scheibe

Infurmaziuns: Departament d'infrastructura, energia e mobilitad

La Regenza ha approvà la revisiun parziala da la planisaziun locala da Claustra, che la vischnanca aveva concludì ils 30 da november 2025. Tras l'approvaziun dals meds da planisaziun respectivs stgaffescha ella las premissas per pudair construir e manar in center da trails da mountainbikes en il territori Rütiwald. Il center da trails planisà vegn a cumpigliar curts trajects d'exercizi, ch'èn colliads in cun l'auter tras in uschenumnà traject da transfer. Plinavant è previsa ina susta da mountainbikes sco lieu per sa fermar e per sa proteger cunter l'aura.

Il project duai cumplettar optimalmain la purschida turistica da la vischnanca e da la regiun. Per realisar il project aveva la vischnanca sviluppà in «Masterplan Mountainbike». Sin fundament da quest masterplan duai la rait da mountainbikes existenta vegnir extendida, uschia ch'ella correspunda a la dumonda. Per las ciclistas ed ils ciclists da muntogna da tut ils nivels e da tut las gruppas da vegliadetgna duai il center da trails, ch'è planisà en il territori Rütiwald, esser in element impurtant per far exercizis e per s'inscuntrar.

© GeoGR SA / Swisstopo

Infurmaziuns: Departament d'economia publica e fatgs socials

La Regenza ha approvà il project «Avertura forestala Val Segnas ed Uaul Run» da la vischnanca da Mustér. Als custs subvenziunabels dal project (var 28,55 milliuns francs) ha ella plinavant garantì a la vischnanca ina contribuziun totala da maximalmain var 20,64 milliuns francs. Questa contribuziun consista d'ina cumpart chantunala e federala che importa totalmain 72,3 pertschient dals custs dal project. Per realisar il project forestal quintan ins cun 25 onns.

L'emprima avertura dals guauds da protecziun impurtants da l'Uaul Run è vegnida realisada ils onns 1951 fin 1972 en connex cun ils rempars da lavinas Val Clavaniev da Latis sur Fuortga, Fistatg Lartg, Bletschs fin Plaun Tir. Oz èn questas vias memia stretgas, han ina capacitad da chargia memia pitschna e mainan en differents abitadis per part tras passaschas stretgas. Qua tras n'èsi betg pli pussaivel da realisar en moda effizienta la tgira dal guaud da protecziun, la racolta da la laina ed ils transports respectivs. Il project planisà cumpiglia pia dus perimeters: il territori Val Segnas ed il territori Uaul Run, cun vias d'ina lunghezza totala da circa 9,2 kilometers. En il territori Val Segnas vegnan sanadas ed engrondidas las vias da guaud e da cultivaziun existentas. Ultra da quai datti novas colliaziuns tranter las vias existentas. En il territori Uaul Run èsi tranter auter previs da construir ina nova via da guaud. Planisà èsi er d'engrondir in deposit da laina e da construir ulteriuras vias da maschinas.

Infurmaziuns: Departament d'infrastructura, energia e mobilitad

La Regenza ha approvà la revisiun parziala da la planisaziun locala da Vaz, che la vischnanca aveva concludì ils 27 da november 2022. Uschia stgaffescha ella las premissas da la planisaziun d'utilisaziun per construir in nov center da seniors a Lai.

Mez dals onns 1980 è l'anteriur Hotel Parc a Lai vegnì transfurmà en ina chasa da persunas attempadas e da tgira. La chasa da persunas attempadas e da tgira «Parc», ch'è en proprietad da la vischnanca politica da Vaz, ha oz var 35 plazs da tgira. La structura architectonica existenta n'ademplescha betg pli las pretensiuns d'ozendi envers in tal manaschi. A medem temp è creschida la dumonda per abitaziuns adattadas a la vegliadetgna respectivamain per furmas d'abitar assistidas. Cun metter a disposiziun ils letgs da tgira ch'èn necessaris per la regiun, duai il nov center da seniors planisà ademplir questa incumbensa publica. Planisà è in nov edifizi a l'entrada nord dal vitg cun totalmain 42 letgs da tgira sco er cun 14 abitaziuns assistidas. Ultra da quai duain vegnir stgaffids circa 200 plazs da parcar publics. Plinavant èn previsas localitads per la Spitex, ina canorta d'uffants e sco opziun er ina pratica da medi.

© GeoGR SA / Swisstopo

Infurmaziuns: Departament d'economia publica e fatgs socials