La Regenza grischuna ha nominà Rainer Zah sco nov manader da l'Uffizi chantunal per la natira e l'ambient. El vegn a surpigliar questa funcziun il 1. da schaner 2027.

La Regenza ha tschernì Rainer Zah sco nov manader da l'Uffizi per la natira e l'ambient (UNA) dal chantun Grischun. La famiglia da l'um da Winterthur ha sias ragischs en la Val Müstair. Suenter avair terminà ses studi ed il doctorat en scienzas da l'ambient e da l'ecologia a la Scola politecnica federala Turitg, ha el manà la gruppa da perscrutaziun «Ökobilanzierung» tar l'Institut federal da controlla da material e da perscrutaziun (Empa). Per la Quantis Consulting, che porscha cussegliaziun da persistenza, ha el fundà e manà ils biros a Turitg ed a Berlin, suenter ha el gestiunà il sectur da fatschenta Ambient da la citad da Turitg. En l'interpresa Ernst & Young è el stà responsabel per la cussegliaziun da persistenza en il sectur public ed actualmain cusseglia el la citad da Berlin a sviluppar sia strategia d'economia circulara.

El ha experientschas cumprovadas da direcziun e dal sectur da l'ambient sco er enconuschientschas fundadas en l'interacziun tranter administraziun, politica e differentas gruppas en mira. En la procedura da tscherna ha el persvadì cunzunt tras sia moda da proceder sin basa scientifica, strategica ed a medem temp pratica sco er tras sia abilitad da dar novs impuls per sviluppar vinavant l'uffizi. Cun sia perspectiva externa, sia egliada strategica e sia gronda abilitad da crear raits vegn Rainer Zah a concepir activamain ensemen cun nus l'orientaziun futura dal UNA.

L'Uffizi per la natira e l'ambient
L'Uffizi per la natira e l'ambient è responsabel per proteger e sviluppar en moda persistenta las basas da viver natiralas en il chantun Grischun. Quellas basas cumpiglian tranter auter secturs sco protecziun da l'ambient e da las auas, protecziun cunter canera, mantegniment da l'aria pura, gestiun da ruments, dumondas dal clima sco er accumpagnament e realisaziun da proceduras e strategias ch'èn relevantas per l'ambient. L'uffizi collavura stretgamain cun vischnancas, posts spezialisads, economia, politica e populaziun.

Fotografia:

Infurmaziuns:

Cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01 (cuntanschibel da las 10.30 fin las 11.30), e‑mail Jondomenic.Parolini@ekud.gr.ch

Responsabladad: Regenza