La Regenza ha adattà la finanziaziun chantunala da la protecziun da muntaneras cun chauns, cunquai che la Confederaziun ha auzà sia participaziun als custs. Plinavant ha la Regenza respundì ina consultaziun federala, nua ch'ella refusa las intervenziuns planisadas da la Confederaziun en il martgà svizzer da vin. Ultra da quai ha ella dà glisch verda per in nov resort d'hotel a Ftan.
Puspè dapli sustegn da la Confederaziun per proteger muntaneras cun chauns
La Regenza ha adattà la finanziaziun da la protecziun da muntaneras cun chauns per ils onns 2026 fin 2028, perquai che las contribuziuns federalas èn vegnidas auzadas. L'onn 2025 aveva il chantun Grischun mess a disposiziun meds supplementars per finanziar mesiras per proteger las muntaneras cun chauns, suenter che la Confederaziun aveva reducì ses sustegn en chaussa. En il fratemp è vegnida adattada l'Ordinaziun federala da chatscha. Perquai paja la Confederaziun dapi il cumenzament dal 2026 puspè contribuziuns pli autas als custs per la protecziun da muntaneras. Ina raschun per l'adattaziun è stada la moziun dal cusseglier dals chantuns Stefan Engler, che aveva la finamira da procurar per ina cofinanziaziun adequata tras la Confederaziun.
La Regenza mantegna il nivel da promoziun cumprovà per chauns da protecziun da muntaneras. Ussa datti dentant puspè ina distgargia finanziala per il chantun. Per ils onns 2026 fin 2028 ha la Regenza fixà ina contribuziun chantunala da maximalmain 558 000 francs per finanziar ils custs totals da var 1,7 milliuns francs. La Confederaziun paja previsiblamain circa 1,15 milliuns francs. Las contribuziuns vegnan duvradas per sustegnair las possessuras ed ils possessurs da chauns da protecziun da muntaneras sco er per indemnisar las activitads che vegnan prestadas da l'Uniun Chauns da protecziun da muntaneras Svizra en il sectur dals chauns da protecziun da muntaneras.
© AGRIDEA
Infurmaziuns: Departament d'economia publica e fatgs socials
La Regenza ha adattà la finanziaziun da la protecziun da muntaneras cun chauns per ils onns 2026 fin 2028, perquai che las contribuziuns federalas èn vegnidas auzadas.
La Regenza refusa las intervenziuns planisadas da la Confederaziun en il martgà svizzer da vin
La Regenza ha prendì posiziun davart in project da consultaziun dal Departament federal d'economia, furmaziun e retschertga (DEFR) en connex cun midadas planisadas da l'Ordinaziun davart il vin. Tras il project duai il contingent da duana da la WTO per vin vegnir repartì en l'avegnir a norma da l'uschenumnada prestaziun svizra, e betg pli sin basa dal mument da la decleraziun d'import. La midada proponida fa part da las stentas da la Confederaziun da sustegnair la branscha svizra da vin, perquai ch'i vegn consumà adina damain vin.
La Regenza refusa il project dal DEFR. En ses egls èn las sfidas da la branscha da vin problems structurals, che na sa laschan betg schliar tras intervenziuns supplementaras en il martgà. Empè da s'orientar a la dumonda effectiva sin il martgà stgaffeschia la regulaziun planisada impuls per survegnir uschè blers contingents d'import sco pussaivel. Uschia existia il privel, che surcapacitads existentas vegnian consolidadas e che adattaziuns necessarias sin il martgà sa retardeschian. Ultra da quai tema la Regenza eventualas sfalsificaziuns da la concurrenza a disfavur d'acturs sin il martgà, che mettan il focus sin innovaziun e commerzi, sco er lavur administrativa supplementara per ils manaschis e las autoritads. Tut en tut è ella da l'avis, che la regulaziun proponida na saja betg adattada per far frunt en moda efficazia a las sfidas duraivlas da la branscha. Perspectivas persistentas vesa ella plitgunsch en l'innovaziun, en l'adattaziun al martgà ed en il rinforzament da la cumpetitivitad da l'economia svizra da vin.
Consultaziuns dal Departament federal d'economia, furmaziun e retschertga (DEFR)
Infurmaziuns: Departament d'economia publica e fatgs socials
La Regenza ha prendì posiziun davart in project da consultaziun dal Departament federal d'economia, furmaziun e retschertga (DEFR) en connex cun midadas planisadas da l'Ordinaziun davart il vin.
Glisch verda per in nov resort d'hotel a Ftan
La Regenza ha approvà la revisiun parziala da la planisaziun locala da Scuol, che la vischnanca aveva concludì ils 30 da november 2025.
Tras questa revisiun parziala duain vegnir stgaffidas las premissas per remplazzar l'hotel existent Paradis tras in nov manaschi d'alloschament, organisà en furma d'in resort cun circa 186 letgs chauds. Per pudair realisar il project èsi stà necessari d'adattar l'urden fundamental da l'anteriura vischnanca da Ftan.
© Andrea Badrutt
Infurmaziuns: Departament d'economia publica e fatgs socials
La Regenza ha approvà la revisiun parziala da la planisaziun locala da Scuol, che la vischnanca aveva concludì ils 30 da november 2025.
Approvà in project collectiv per ovras da protecziun
La Regenza ha approvà il project collectiv «Reparaziun d'ovras da protecziun 2026» da differentas vischnancas, da la Viafier retica e da l'Uffizi da construcziun bassa dal Grischun. Plinavant ha ella concedì ina contribuziun chantunala da circa 5,02 milliuns francs per realisar quest project.
Il project ha la finamira da conservar ovras da protecziun existentas cunter privels da la natira cun mantegnair il standard oriund, sco er da meglierar l'effect da quests stabiliments. Questas mesiras da mantegniment èn indispensablas per mantegnair l'effect da protecziun e per betg augmentar la ristga da privels da la natira per ils abitadis e per las infrastructuras da traffic. En il rom dal project collectiv 2026 vegnan reparads 28 objects entaifer 2 onns. Tut en tut èn budgetads 5,66 milliuns francs per realisar il project.
Glista dals projects d'ovras da protecziun 2026
Infurmaziuns: Departament d'infrastructura, energia e mobilitad
La Regenza ha approvà il project collectiv «Reparaziun d'ovras da protecziun 2026» da differentas vischnancas, da la Viafier retica e da l'Uffizi da construcziun bassa dal Grischun.
Contribuziuns per centers da trenament grischuns
DOrd la finanziaziun speziala Sport ha la Regenza concedì pliras contribuziuns a centers da trenament regiunals e naziunals che han lur sedia e lur activitad principala en il chantun Grischun. Plinavant ston ils centers da trenament esser cuntegnids en il concept da juniors da la federaziun naziunala e pudair cumprovar, ch'els survegnan ina contribuziun a la promoziun da juniors da Swiss Olympic. A tut en tut 39 centers da trenament ha la Regenza uschia garantì contribuziuns da totalmain 812 300 francs.
Infurmaziuns: Departament d'educaziun, cultura e protecziun da l'ambient
Ord la finanziaziun speziala Sport ha la Regenza concedì pliras contribuziuns a centers da trenament regiunals e naziunals che han lur sedia e lur activitad principala en il chantun Grischun.
