La Regenza ha approvà il project «Nova staziun IMIS Brusio» da l'Uffizi da construcziun bassa dal Grischun. Il project è budgetà cun 117 000 francs e vegn cofinanzià tras contribuziuns tenor la legislaziun chantunala davart il guaud. En il rom dal project vegn installada sur Viano ina staziun per mesirar la naiv, per uschia meglierar las basas da decisiun per las cumissiuns localas da lavinas e per ils servetschs naziunals d'avertiment da lavinas.

La via chantunala da Brusio a Viano sco er la via da colliaziun cuntinuanta a La Dogana èn adina puspè periclitadas da lavinas da naiv bletscha che vegnan giu da las spundas stippas da las vals lateralas Val Fileit, Val Sarasca, Val Irola e Val Braga. Perquai ch'i mancan staziuns da mesiraziun en il Puschlav, na datti actualmain strusch datas davart la quantitad da naiv, davart las relaziuns da vent e davart las temperaturas. Per la cumissiun da lavinas da l'Uffizi da construcziun bassa (UCB) e per la vischnanca da Brusio èsi perquai fitg difficil da giuditgar il privel da lavinas. Per quest motiv vegn installada ina staziun da mesiraziun sin la gonda planiva da «Ganda Piana» sut il Pass Purtun sin 2350 m s.m. La staziun duai registrar parameters relevants da la naiv e da l'aura per giuditgar il privel da lavinas e vegnir integrada en il sistem interchantunal da mesiraziun e d'infurmaziun existent (IMIS). Uschia resultan meglras basas da datas ed il giudicament dal privel da lavinas vegn optimà, quai che augmenta la finala la segirezza per la populaziun.