Ina delegaziun dal Cussegl grond dal chantun Argovia ha visità oz durant la sessiun da zercladur 2026 il Cussegl grond dal Grischun.
La delegaziun da 12 persunas dal chantun Argovia è vegnida timunada dal president dal Cussegl grond Urs Plüss. El è vegnì accumpagnà dals dus vicepresidents Ralf Bucher e Daniel Notter, da las presidentas e dals presidents da las fracziuns dal Cussegl grond dal chantun Argovia, da la manadra dal Servetsch dal parlament sco er da la saltera.
Ils giasts dal chantun Argovia èn vegnids beneventads da la presidenta dal Cussegl grond Valérie Favre Accola. Participà a l'inscunter han er represchentantas e represchentants da las fracziuns dal Cussegl grond dal Grischun. L'avantmezdi ha la delegaziun assistì a las tractativas currentas en l'edifizi dal Cussegl grond. Suenter è in gentar cuminaivel stà sin il program. Il program accumpagnant ha cumenzà gia il di avant cun ina visita a la Festa federala da tir a Cuira.
Las visitas d'auters parlaments servan al barat d'experientschas sco er a la tgira da las relaziuns amicablas. Quests inscunters cun persunas directivas da parlaments chantunals han lieu ina fin duas giadas per onn.
Fotografias agiuntadas:
Las duas delegaziuns en l'edifizi dal Cussegl grond a Cuira.
La presidenta dal Cussegl grond Valérie Favre Accola beneventa a Cuira il president dal Cussegl grond dal chantun Argovia Urs Plüss.
Infurmaziuns:
Patrick Barandun, manader dal Secretariat dal Cussegl grond, Chanzlia chantunala, tel. +41 81 257 22 32, e‑mail Patrick.Barandun@staka.gr.ch
Responsabladad: Chanzlia chantunala dal Grischun / Secretariat dal Cussegl grond