La Regenza grischuna ha retschavì oz per in inscunter da lavur la Regenza dal pajais federativ Tirol. La scuntrada ha purschì l'occasiun per discutar divers temas politics ch'èn d'interess cuminaivel.
La Regenza grischuna ha beneventà oz la Regenza dal pajais federativ Tirol en il Chastè Salenegg a Maiavilla. Manada dal president da la Regenza Anton Mattle è la delegaziun dal Tirol plinavant sa cumponida dals vicepresidents Philip Wohlgemuth e Josef Geisler, da las cusseglieras guvernativas Astrid Mair e Eva Pawlata sco er dal cusseglier guvernativ Mario Gerber. L'inscunter dad oz dat perditga da las relaziuns excellentas tranter las duas regenzas.
Barat politic multifar
En il decurs dals discurs politics èn las duas regenzas sa barattadas davart numerus temas transcunfinals ch'èn d'interess cuminaivel. Tematisads èn vegnids per exempel il management dal luf, la digitalisaziun ed ils privels da la natira. Er davart ils temas garantir persunal qualifitgà ed abitar en il territori alpin èn las participantas ed ils participants sa barattads.
Ultra dal discurs da lavur è er in referat da l'archivari dal stadi Reto Weiss stà sin il program. En il referat èn vegnidas explitgadas las colliaziuns istoricas dal chantun Grischun cun il pajais federativ Tirol, mettend in accent spezial sin l'istorgia cuminaivla dals Gualsers. Sco finiziun han las duas delegaziuns gentà ensemen en il Chastè da Maiavilla.
Fotografias agiuntadas:
Il president da la Regenza grischuna Martin Bühler beneventa a Maiavilla il president da la Regenza tirolaisa Anton Mattle
Las delegaziuns da las regenzas davant il Chastè Salenegg a Maiavilla
Ulteriuras fotografias da l'inscunter
Infurmaziuns:
President da la Regenza Martin Bühler, schef dal Departament da finanzas e vischnancas, e‑mail Martin.Buehler@dfg.gr.ch
Responsabladad: Regenza