Il Departament d'educaziun, cultura e protecziun da l'ambient ha elegì Raphael Gygax sco nov directur dal Museum d'art dal Grischun. El surpiglia questa funcziun il 1. d'avust 2027.

Il Departament d'educaziun, cultura e protecziun da l'ambient (DECA) ha elegì Raphael Gygax sco nov directur dal Museum d'art dal Grischun. Suenter ses engaschament da blers onns sco directur e pli tard sco directur artistic dal Museum d'art dal Grischun vegn Stephan Kunz pensiunà. A chaschun da l'elecziun dal nov directur vegn fatga ina reorganisaziun sco mument sapientiv per sviluppar vinavant incumbensas, cumpetenzas e process là, nua che novas sfidas u pretensiuns sa mussan.

Raphael Gygax ha in'experientscha da blers onns en ils fatgs da museum e d'exposiziuns sin plaun naziunal ed internaziunal. El ha occupà differentas funcziuns directivas en instituziuns d'art renumadas ed ha per consequenza vastas cumpetenzas en ils secturs da curatar, sviluppar exposiziuns, strategia, direcziun e collavuraziun cun differentas gruppas en mira.

Blers onns experientscha e gronda rait
Durant la procedura da selecziun ha el persvadì oravant tut cun sia expertisa professiunala cumprovada en art modern e contemporan, ses pensar strategic, sia persunalitad directiva reflectada sco er cun sia abilitad d'unir differents interess. Cun sia experientscha da sviluppar instituziuns culturalas, sia vasta rait naziunala ed internaziunala e sia chapientscha per la cumbinaziun da qualitad artistica e direcziun organisatorica ha el las meglras premissas per manar il Museum d'art dal Grischun cun success en l'avegnir.

La recrutaziun è vegnida fatga en ina procedura da plirs pass sut la direcziun da l'Uffizi da cultura e cun sustegn da l'Uffizi da persunal dal Grischun. Sco accumpagnament professiunal è vegnida nominada ina cumissiun da selecziun. Tala è sa cumponida da represchentantas e represchentants da l'Uffizi da cultura, da l'Uniun grischuna d'art, da la Fundaziun Collecziun grischuna d'art sco er da duas expertas ed experts externs.

Davart il Museum d'art dal Grischun di Raphael Gygax: «Il Museum d'art dal Grischun è ina da las pli impurtantas instituziuns d'art da la Svizra. Sia collecziun excellenta, sia ferma francaziun regiunala e sia attracziun internaziunala porschan premissas idealas, per sviluppar vinavant l'art sco lieu da savida, da scuverta e dal barat social. Jau m'allegrel fitg da pudair concepir ensemen cun il team, l'Uniun grischuna d'art, la Fundaziun Collecziun grischuna d'art ed il chantun Grischun l'avegnir dal museum.»

Fotografia:

Infurmaziuns:

• Cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, e‑mail Jondomenic.Parolini@ekud.gr.ch
• Ursin Widmer, manader da l'Uffizi da cultura, tel. +41 81 257 48 01 (cuntanschibel da las 14.00 fin las 17.00), e‑mail Ursin.Widmer@afk.gr.ch

Responsabladad: Departament d'educaziun, cultura e protecziun da l'ambient