Pervia da las temperaturas constantamain fitg autas e pervia da la setgira extraordinaria pronunzia l'Uffizi da guaud e privels da la natira per pliras regiuns dal Grischun in scumond absolut da far fieu al liber.
Il scumond absolut da far fieu vala a partir da venderdi, ils 26 da zercladur 2026, a las 12.00, per la Val dal Rain da Cuira, il Partenz, il Scanvetg, la Surselva sco er la Mantogna / Tumleastga. I na po betg vegnir exclus, ch'in scumond da far fieu sto vegnir pronunzià ils proxims dis per ulteriuras regiuns. Tenor las prognosas da l'aura restan las temperaturas vinavant fitg autas ed i dat mo singuls urizis.
En ils territoris pertutgads èn scumandadas tut las activitads da fieu al liber. Exceptadas da quest scumond èn las zonas d'abitadis. Quellas cumpiglian tut las zonas da construcziun cun vigur legala sco er las surfatschas ch'èn circumdadas cumplettamain da zonas da construcziun tenor las prescripziuns da las vischnancas. Cumplementarmain a quest scumond da far fieu pon las vischnancas pronunziar ulteriuras disposiziuns che pertutgan er las zonas d'abitadis. Talas regulaziuns communalas ston vegnir observadas separadamain.
Pervia da l'aura da stad sitga e chauda sco er pervia da dis cun bler vent èn ils terrens dals guauds ed il chagliom setgads ora fermamain las ultimas emnas. Ultra da quai è la bilantscha da las precipitaziuns da l'emprima mesadad da l'onn cleramain sut la media da blers onns. Sut questas cundiziuns cumenzi fitg svelt ad arder ed ils fieus pon sa derasar rasantamain.
Per che la situaziun sa mitigeschia, dovri plievgias intensivas da plirs dis. Pitschnas quantitads da precipitaziuns, sco urizis d'ina u da duas uras u ina leva plievgia, n'arrivan betg tras las tschimas e na cuntanschan betg il terrens dal guaud. Per mitigiar duraivlamain la situaziun na bastan levas precipitaziuns betg.
Ulteriuras infurmaziuns sco er il giudicament da la situaziun actuala stattan a disposiziun sin la pagina d'internet www.waldbrandgefahr.gr.ch.
Infurmaziuns:
Andrea Kaltenbrunner, Surveglianza dal guaud, Uffizi da guaud e privels da la natira, tel. +41 81 257 38 68 (cuntanschibel da las 09.00 fin las 12.00), e‑mail Andrea.Kaltenbrunner@awn.gr.ch
Responsabladad: Uffizi da guaud e privels da la natira