La Regenza ha nominà las represchentanzas dal chantun sco er las collavuraturas ed ils collavuraturs en uffizi accessoric dal chantun Grischun per la perioda dal 1. da fanadur 2026 fin ils 30 da zercladur 2030.

Las represchentanzas dal chantun èn persunas che vegnan delegadas dal chantun, respectivamain che fan uffizialmain part dals organs directivs strategics da participaziuns, d'uniuns e da fundaziuns u da societads en la facultad finanziala dal chantun. La Regenza ha elegì represchentanzas dal chantun per 13 instituziuns.

Las collavuraturas ed ils collavuraturs en uffizi accessoric èn persunas che adempleschan incumbensas administrativas, ma ch'èn activas ordaifer l'organisaziun administrativa pli stretga. Las cumissiuns ed ils gremis, dals quals las collavuraturas ed ils collavuraturs en uffizi accessoric fan part, èn attribuids administrativamain ad in dals tschintg departaments u a la Chanzlia chantunala.

Tut en tut ha la Regenza nominà 19 cumissiuns e gremis. 9 dunnas e 14 umens èn vegnids elegids da nov sco collavuraturas e collavuraturs en uffizi accessoric. La quota da dunnas en las cumissiuns che la Regenza ha elegì, importa da nov en media 28 pertschient.

Ina survista da las represchentanzas dal chantun e da las cumissiuns / collavuraturas e collavuraturs en uffizi accessoric stat a disposiziun sin la pagina d'internet dal chantun.

Infurmaziuns:

President da la Regenza Martin Bühler, schef dal Departament da finanzas e vischnancas. Las dumondas vegnan coordinadas da Seraina Hostettler, responsabla per la communicaziun dal Departament da finanzas e vischnancas, tel. +41 81 257 32 05, e‑mail Seraina.Hostettler@dfg.gr.ch

Responsabladad: Regenza