Cun agid d'in concept da traffic ha il chantun Grischun procurà, ch'il traffic transcunfinal als Gieus olimpics d'enviern Milano Cortina 2026 ed enavos ha funcziunà senza incaps. La Regenza è s'engaschada, per che la regiun Lumbardia surpiglia ina part dals custs. Sin fundament dals ultims discurs ha la Lumbardia ussa garantì cleramain, ch'ella vegnia a surpigliar ina part dals custs resultads.
Ils 25avels Gieus olimpics d'enviern han gì lieu dals 6 fin ils 22 da favrer 2026 en l'Italia dal Nord. Pervia da la vischinanza geografica è il chantun Grischun stà pertutgà directamain da las consequenzas da quest grond event internaziunal. Per garantir ch'il traffic possia circular durant la stagiun auta en las destinaziuns turisticas d'enviern dal Grischun, ha il chantun elavurà e realisà in concept da traffic. En quest connex ha la Regenza fatg quint cun custs da var 5,5 milliuns francs. Las expensas effectivas èn la finala stadas cleramain pli bassas ch'ils custs budgetads.
Garantì da sa participar als custs
Las persunas responsablas da la regiun Lumbardia avevan gia empermess ordavant da sa participar als custs dal concept da traffic. Malgrà ch'il chantun ha tschertgà pliras giadas il contact, n'è quai fin ussa betg capità. Sin basa dals ultims discurs intensivs e grazia al sustegn dal cusseglier federal Ignazio Cassis sco er da l'ambassadur svizzer a Roma, Roberto Balzaretti, ha il president da la regiun Lumbardia, Attilio Fontana, garantì a la Regenza en scrit da sa participar als custs.
Igl è chaussa da la regiun Lumbardia da sclerir las dumondas ch'èn ord sia vista anc avertas. Cun questa garanzia en scrit è la regiun Lumbardia ussa dumandada, da procurar per il pajament da la contribuziun mancanta. Sch'il pajament na vegniss – cunter tuttas aspectativas – betg realisà, sa resalva la Regenza da scuntrar l'import cun pajaments pendents a l'Italia.
Infurmaziuns:
President da la Regenza Martin Bühler, schef dal Departament da finanzas e vischnancas, tel. +41 81 257 32 05 (cuntanschibel fin las 16.00), e‑mail Martin.Buehler@dfg.gr.ch
Responsabladad: Regenza