Ils 10 da favrer 2026 ed ils 10 da mars 2026 han gì lieu ils examens d'admissiun chantunals per entrar en ina scola media grischuna. 540 (l'onn avant: 532) scolaras e scolars han dumagnà l'admissiun en ina da las nov scolas medias grischunas cun las partiziuns gimnasi, scola media commerziala, scola media d'informatica e scola media spezialisada.

Tut en tut han 883 scolaras e scolars frequentà ils examens d'admissiun chantunals en ina da las nov scolas medias grischunas. L'onn precedent eran quai 850 candidatas e candidats.

Examen d'admissiun per la 1. classa dal gimnasi da lunga durada
Da las 408 (l'onn avant: 371) scolaras e scolars da la 6. classa primara che han fatg l'examen d'admissiun han 238 (58,33 pertschient) reussì l'admissiun en la 1. classa dal gimnasi da 6 onns (uschenumnà gimnasi da lunga durada). Cumpareglià cun tut las 1856 scolaras e scolars da la 6. classa primara en il chantun (l'onn avant: 1745) importa la quota da giuvenils admess a la 1. classa dal gimnasi da lunga durada 12,82 pertschient. La quota d'admissiun da l'onn precedent era cun 12,78 pertschient in zic pli bassa.

Examen unifitgà per la 3. classa gimnasiala sco er per la 1. classa da la scola media commerziala, d'informatica u spezialisada
Da las 475 scolaras e scolars che han fatg quest onn l'examen unifitgà per l'admissiun en la 3. classa gimnasiala u en la 1. classa da la scola media commerziala, da la scola media d'informatica u da la scola media spezialisada, han 196 (41,27 pertschient) dumagnà l'admissiun en la 3. classa gimnasiala e 106 (22,31 pertschient) l'admissiun en la 1. classa da la scola media commerziala, d'informatica u spezialisada. L'onn avant han 479 giuvenils fatg l'examen unifitgà. La quota d'admissiun per entrar en la 3. classa gimnasiala importa quest onn var 10,99 pertschient da l'annada da referenza ed è pia minim pli bassa che l'onn precedent (11,07 pertschient).

Success tar ils examens finals a las scolas medias dal Grischun
Tut en tut han 545 scolaras e scolars (l'onn avant: 518) absolvì ils examens finals en ina da las nov scolas medias dal Grischun sco er a la Scuola Svizzera Rahn Education Milano (386 la maturitad gimnasiala [l'onn avant: 360], 69 il diplom da scola media professiunala [l'onn avant: 59], 55 la maturitad spezialisada [l'onn avant: 66] e 35 il diplom da scola media commerziala [l'onn avant: 33]). 539 han gì success (l'onn avant: 507) ed han retschavì a la fin da l'onn da scola lur attestat final.

Infurmaziuns:

Regina Just Brodbeck, manadra da la partiziun Scolas medias, Uffizi per la furmaziun media-superiura, tel. +41 81 257 61 69 (cuntanschibla da las 09.00 fin las 11.00), e‑mail Regina.Just@ahb.gr.ch

Responsabladad: Uffizi per la furmaziun media-superiura