Cun sviluppar vinavant la promoziun da talents en la furmaziun professiunala da basa ha il chantun Grischun reelavurà dal tuttafatg il concept «Furmaziun professiunala e talents».
Il concept sco er in catalog da mesiras mussan, co che la promoziun da talents en la furmaziun professiunala da basa duai vegnir sviluppada vinavant cun cleras finamiras ils proxims onns.
Gronda analisa sco basa per l'ulteriur svilup
Il nov concept sa basa sin in'analisa cumplessiva da la situaziun, sin ina cumparegliaziun cun auters chantuns sco er sin l'integraziun da las gruppas d'interess impurtantas. Latiers tutgan talents, manaschis d'emprendissadi, scolas professiunalas spezialisadas, purschiders da curs intermanaschials sco er organisaziuns dal sport, da la musica e da l'art. L'analisa ha confermà il grond engaschament da tut las parts participadas ed ha explitgà a medem temp potenzials d'optimaziun.
16 mesiras dal concept èn vegnidas elavuradas, priorisadas e transferidas en projects da realisaziun concrets. In accent spezial è quel da cussegliar a temp ed en moda fidada ils talents. Il rinforzament da la rait da cussegliaziun, l'adattaziun da models flexibels d'emprender e d'examen sco er la meglra colliaziun/visibilitad da manaschis d'emprendissadi favuraivels per talents èn ulteriurs temas da focus.
Il catalog da mesiras serva sco basa da lavur cuminaivla per realisar il concept pass per pass durant ils proxims onns. La finamira è quella d'accumpagnar en moda fidada talents sur tut ils stgalims da furmaziun e da sviluppar vinavant en moda persistenta la promoziun da talents. Uschia na vegn betg mo rinforzà l'avegnir dals talents, mabain er l'attractivitad da la furmaziun professiunala da basa en il chantun.
Il concept «Furmaziun professiunala e talents» sco er il catalog da mesiras stattan a disposiziun sin la pagina d'internet da l'Uffizi per la furmaziun professiunala: Furmaziun professiunala e talents
Infurmaziuns:
Petra Wyss, manadra da la partiziun Cussegliaziun da professiun, da studi e da carriera, Uffizi per la furmaziun professiunala, tel. +41 81 257 27 05 (cuntanschibla da las 08.00 fin las 12.00), e‑mail Petra.Wyss@afb.gr.ch
Responsabladad: Uffizi per la furmaziun professiunala