En pliras regiuns dal Grischun procuran la chalira constanta e la setgira extraordinaria vinavant per in fitg grond privel d'incendis da guaud e da cultira. Il scumond absolut da far fieu en il liber che vala gia, resta perquai er en vigur en vista a la festa federala dal 1. d'avust. Pervia da la situaziun actuala vegn il scumond da far fieu extendì sin ulteriuras regiuns.

Pertutgadas vinavant dal scumond absolut da far fieu èn la Val dal Rain da Cuira sco er las regiuns Partenz, Scanvetg, Surselva, Mantogna/Tumleastga, Schons-Alvra, Moesano, Bregaglia e Puschlav. Da nov vala il scumond absolut da far fieu er en las regiuns Valragn, Surses, Bravuogn Filisur, Tavau-Claustra e Val Müstair.

En ils territoris pertutgads èn scumandads tut ils fieus en il liber. Scumandà èsi er da far fieus sin ils auts, d'envidar fieus artifizials (pirotecnics) e da laschar ir rachetas. En il chantun Grischun èsi l'entir onn scumandà da laschar ascender laternas sgulantas. Grils da lain e da charvun da lain na dastgan betg vegnir utilisads. Permess èn mo grils da gas ed electrics sin in fundament fix e mo sut surveglianza permanenta. Er cun grillar ston ins esser extrem precaut.

Exceptà dal scumond da far fieu tenor l'art. 31b LG èn ils territoris d'abitadi. Quels cumpiglian tut las zonas da construcziun cun vigur legala sco er las surfatschas ch'èn circumdadas cumplettamain da zonas da construcziun tenor las prescripziuns da las vischnancas. Sin basa da la Lescha davart la protecziun cunter incendis pon las vischnancas relaschar ulteriuras prescripziuns davart il scumond da far fieu e/u davart l'envidar fieus artifizials (pirotecnics). Questas prescripziuns ston vegnir resguardadas spezialmain.

En las ulteriuras regiuns dal chantun dastgan ils fuclars designads vegnir duvrads mo cun la pli gronda precauziun. Ils fieus na dastgan mai vegnir laschads senza surveglianza e ston vegnir stizzads cumplettamain avant che bandunar il lieu. Cigarettas, zulprins e battafieus na dastgan betg simplamain vegnir bittads davent.

Per che la situaziun sa calmia, dovri precipitaziuns intensivas durant plirs dis. Curts urizis u mo pitschnas quantitads da plievgia na bastan betg.Il chantun engrazia a la populaziun ed als giasts per la chapientscha e per lur agid.

Ulteriuras infurmaziuns sco er in giudicament actual da la situaziun èn publitgads sin la pagina d'internet www.waldbrandgefahr.gr.ch.

Infurmaziuns:

• Andrea Kaltenbrunner, Surveglianza dal guaud, Uffizi da guaud e privels da la natira, tel. +41 81 257 38 68 (cuntanschibel da las 10.00 fin las 12.00), e‑mail Andrea.Kaltenbrunner@awn.gr.ch
• Lukas Speigl, Surveglianza dal guaud, Uffizi da guaud e privels da la natira, tel. +41 81 257 21 59 (cuntanschibel da las 10.00 fin las 12.00), e‑mail Lukas.Speigl@awn.gr.ch

Responsabladad: Uffizi da guaud e privels da la natira