Il chantun Grischun intensivescha sias mesiras per cumbatter la violenza a chasa e la violenza tipica per la schlattaina. Ina nova Lescha cunter violenza a chasa (LVC) duai garantir la basa giuridica per in proceder coordinà ed interdisciplinar. La Regenza ha deliberà la missiva per mauns dal Cussegl grond per la tractar en la sessiun d'october 2026.
La violenza a chasa e la violenza tipica per la schlattaina pertutgan persunas da tut las gruppas da vegliadetgna e da tut las classas socialas. La violenza po esser da natira corporala, psichica, sexuala u economica e sa manifestescha savens en relaziuns ch'èn caracterisadas d'intimitad u da dependenza. La lescha s'orientescha a la definiziun da la Convenziun d'Istanbul e resguarda la violenza entaifer partenadis existents u precedents sco er entaifer relaziuns famigliaras. Betg sco ultim è la Lescha cunter violenza a chasa er in cler signal, che violenza n'ha betg plaz en nossa societad e ch'ella vegn impedida e cumbattida sistematicamain.
Rinforzar la collavuraziun interdisciplinara
In element central è quel da fixar la collavuraziun interdisciplinara da tut las parts participadas en la lescha. La collavuraziun existenta a la «Maisa radunda Violenza a chasa» duai vegnir consolidada duraivlamain. Il Post da coordinaziun Violenza a chasa tar l'Uffizi chantunal dal servetsch social surpiglia vinavant la coordinaziun e la promoziun da la collavuraziun tranter las autoritads, ils posts spezialisads e las organisaziuns privatas.
Basa da datas unitara per mesiras sistematicas
Per meglierar la prevenziun ed il cumbat da violenza a chasa e da violenza tipica per la schlattaina vegn creada ina collecziun da datas chantunala. Ella è adattada per percepir baud svilups e per deducir mesiras che correspundan als basegns. Endatadas vegnan tranter auter infurmaziuns davart la furma da violenza, la relaziun tranter la persuna violenta e la persuna ch'è pertutgada da la violenza, la vegliadetgna, la schlattaina sco er aspects geografics. Las datas restan anonimas. A maun d'in rapport vegn la publicitad infurmada regularmain davart ils resultats.
Agiunta:
Missiva «Lescha cunter violenza a chasa (LVC)»
Infurmaziuns:
Cusseglier guvernativ Marcus Caduff, schef dal Departament d'economia publica e fatgs socials stat a disposiziun per dumondas en il rom da l'inscunter regular cun las medias dals 11 d'avust 2026
Ulteriuras dumondas da las medias vegnan coordinadas da Nadja Cadonau, responsabla per la communicaziun dal Departament d'economia publica e fatgs socials, tel. +41 81 257 44 60, e‑mail Nadja.Cadonau@dvs.gr.ch
Responsabladad: Regenza