Sin invit da la Regenza ha l'ambassadur canadais, Jean-Paul Lemieux, visità oz il chantun Grischun.

L'ambassadur Jean-Paul Albert Lemieux è vegnì beneventà oz en la Chasa grischa a Cuira dal president da la Regenza Martin Bühler, dal chancelier Daniel Spadin e da l'incumbensà per relaziuns externas Dominik Hemmi. L'ambassadur è vegnì accumpagnà da Virginie Lévesque, cussegliera d'ambassada, e d'Adam Jacques, delegà commerzial principal. Suenter il barat dals salids uffizials è in gentar cuminaivel stà sin il program.

La Regenza grischuna tgira annualmain contacts cun represchentantas e represchentants da stadis esters en Svizra. Ils discurs èn elements impurtants da las relaziuns externas dal chantun. Cun ils stadis vischins e cun ils pajais che han relaziuns spezialas cun la Svizra e cun il Grischun vegnan savens discutadas dumondas specificas actualas. Autras visitas servan en emprima lingia a barattar experientschas sin il champ cultural, economic e politic.

Fotografia:

Da sanestra a dretga: Virginie Lévesque, chancelier Daniel Spadin, ambassadur Jean-Paul Lemieux, president da la Regenza Martin Bühler, Adam Jacques ed Dominik Hemmi

Infurmaziuns:

President da la Regenza Martin Bühler, schef dal Departament da finanzas e vischnancas, e‑mail Martin.Buehler@dfg.gr.ch

Responsabladad: Regenza