Suenter il grond incendi desastrus dal venderdi passà a Tusaun han ins ussa chattà tut las persunas sparidas. Displaschaivlamain èsi ussa tschert, che quatter persunas èn vegnidas chattadas mortas en las ruinas. La Regenza exprima sia consternaziun e sia gronda tristezza ed admetta als confamigliars sia sincera condolientscha.

La Regenza è fitg consternada dals eveniments tragics ch'èn capitads la notg sin venderdi a Tusaun. A las famiglias, a las amias ed als amis ed a tut las persunas participadas giavischa ella blera forza en questas uras tristas.

Tut en tut han 14 persunas pudì bandunar il venderdi l'edifizi en flommas. Tranter quellas otg persunas blessadas – duas dad ellas cun grevas blessuras, duas cun blessuras mez grevas e quatter cun levas blessuras. La Regenza giavischa a las persunas blessadas ina svelta e cumplaina guariziun.

A medem temp engrazia la Regenza a tut las forzas d'acziun dal chantun, da la vischnanca e da terzas organisaziuns sco er a tut las autras persunas participadas per lur engaschament exemplaric.

Infurmaziuns:

President da la Regenza Martin Bühler, schef dal Departament da finanzas e vischnancas, e‑mail Martin.Buehler@dfg.gr.ch

Responsabladad: Regenza