Suenter las malauras dals 20 d'avust 2026 resta la via da Calanca, en il nord da Buseno, probablamain serrada almain fin la fin da l'emna. La raschun èn pliras bovas da glitta sco er las cundiziuns meteorologicas constantamain difficilas che impedeschan lavurs da rumida segiras.

Las fermas precipitaziuns da la gievgia, ils 20 d'avust 2026, en la Val Calanca han chaschunà bovas da glitta en quatter differents lieus. Aua, glitta, glera e laina han sutterrà plirs trajects da la via. Gia il venderdi saira ha l'Uffizi da construcziun bassa (UCB) puspè pudì avrir la colliaziun fin al spartavias da Buseno. La part nord da la val resta vinavant isolada.

Segirar il grip e rumir il material
Actualmain vegn rumida ina gronda quantitad da grippa e crappa en la regiun «Pont Nef». Circa 10 collavuraturs èn en acziun per segirar parts luccas dal grip e per stgaffir las premissas per ina rumida segira. Apaina ch'ils geologs dattan liber il territori, vegn il UCB a cumenzar cun las lavurs da rumida. La finamira è da transportar las maschinas necessarias damaun mardi tras ils trajects pertutgads vers nord, uschia che las lavurs da rumida pon cumenzar dad omaduas varts.

Segirezza da las forzas d'acziun ha l'emprima prioritad
La segirezza da las forzas d'acziun ha l'emprima prioritad tar tut las lavurs. Las precipitaziuns prognostitgadas difficulteschan considerablamain l'acziun: Suenter plievgias pli fermas è l'access al territori pertutgà scumandà durant in tschert temp, perquai ch'i po dar da tut temp ulteriuras bovas u crudadas da crappa. Quai po retardar las lavurs, malgrà il grond engaschament dal persunal.

Il UCB lavura cun tutta forza per puspè avrir uschè svelt sco pussaivel la via da Calanca. Quant ditg che la via resta serrada exactamain, dependa essenzialmain dal svilup da l'aura e dals giudicaments da la segirezza al lieu. La dimensiun d'eventuals donns vi da l'infrastructura da la via po vegnir giuditgada en moda fidada pir suenter che las lavurs da rumida èn terminadas.

Fotografias agiuntadas:

  Fotografia 1 e 2: Fotografias ord l'aria da la via da Calanca en la regiun «Pont Nef»

 Fotografia 3: Emprimas lavurs da rumida sin la via da Calanca

Infurmaziuns:

Andrea Peduzzi, schef dal district 2 Mesauc, Uffizi da construcziun bassa, tel. +41 91 822 81 15 (cuntanschibel da las 16.00 fin las 17.00), e‑mail Andrea.Peduzzi@tba.gr.ch

Responsabladad: Uffizi da construcziun bassa