La Regenza grischuna ha elegì Patrick Brunold sco nov manader da l'Uffizi da militar e da protecziun civila. El surpiglia questa funcziun a partir dal 1. da settember 2026.
Patrick Brunold che ha 42 onns, è stà fin ussa vicemanader da l'Uffizi da militar e da protecziun civila (UMPC), nua ch'el ha manà dapi l'onn 2024 la partiziun Protecziun da la populaziun. Avant ch'el ha cumenzà l'onn 2013 sia carriera tar il UMPC sco coordinatur da la protecziun da la populaziun, ha l'informaticher diplomà lavurà durant 5 onns per l'armada. Sco cumandant da cumpagnia ha el instruì recruts e lur cader. En il fratemp ha el il rang da litinent colonel. El ha absolvì studis da master en economia da manaschi sco er en prevenziun da ristgas e management da catastrofas a la Scola auta spezialisada da la Svizra Orientala ed a l'Universitad da Vienna. Sco manader da l'Uffizi da militar e da protecziun civila è Patrick Brunold er schef dal Stab directiv chantunal.
Cun l'elecziun da Patrick Brunold èn puspè occupadas las plazzas-clav en il UMPC. Il process cun accumpagnament extern per examinar las structuras ed ils andaments ha pudì vegnir terminà.
L'Uffizi da militar e da protecziun civila ha la direcziun generala da la protecziun da la populaziun en il sectur da las planisaziuns preventivas. El è responsabel per ils secturs Protecziun civila edifizis e Protecziun civila acziun/instrucziun. El ha l'incumbensa da proteger la populaziun e sia basa da viver en cas da catastrofas ed en situaziuns d'urgenza. Ultra da quai planisescha e realisescha el mesiras da protecziun ed agids per la populaziun e per sia basa da viver.
En cooperaziun cun las organisaziuns partenarias e cun las vischnancas gida il UMPC a reducir ed a dumagnar cas da donns. El scolescha e perfecziunescha las commembras ed ils commembers dal Stab directiv chantunal sco er dals stabs directivs communals. En il sectur dal militar exequescha il UMPC las incumbensas che vegnan delegadas al chantun tenor la Lescha militara. Patrick Brunold maina en l'uffizi circa 25 collavuraturas e collavuraturs.
Fotografia:
Infurmaziuns:
Cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01 (cuntanschibel da las 13.00 fin las 13.30), e‑mail Medienstelle@djsg.gr.ch
Responsabladad: Regenza