Daniel Stein surpiglia il cumenzament da la stad 2027 la direcziun da la Polizia chantunala dal Grischun. Daniel Stein è vegnì elegì da la Regenza grischuna e daventa uschia successur da Walter Schlegel, che va en pensiun suenter 15 onns sco cumandant da la Polizia chantunala.

Daniel Stein ha 54 onns, ha frequentà la Scola da polizia a Turitg e fatg il Master of Law a l'Universitad da Turitg. El posseda il certificat professiunal federal per fiduziaris, in Executive MBA internaziunal da l'Universitad da Salzburg ed ha absolvì furmaziuns supplementaras en direcziun e management. Actualmain viva Daniel Stein cun sia famiglia a Turitg. L'onn proxim vegn el a sa chasar en il Grischun.

Dal 2009 fin il cumenzament da l'onn 2017 è Daniel Stein stà cumandant da la Polizia da la citad dad Uster. Fin la fin da l'onn 2019 è el lura stà chanzlist municipal e schef da l'administraziun da la citad dad Uster. Dapi il 1. da schaner 2020 lavura el tar la Polizia da la citad da Turitg, actualmain sco schef da la partiziun d'acziuns e sco emprim substitut dal cumandant. Tar l'Armada svizra aveva Daniel Stein il grad da litinent colonel.

Suenter ina procedura da selecziun da plirs stgalims ha la Regenza grond plaschair d'avair chattà, cun Daniel Stein, ina persuna spezialisada cumprovada cun gronda cumpetenza sociala per la direcziun da la Polizia chantunala dal Grischun. Il cumandant da la Polizia chantunala è responsabel per passa 500 collavuraturas e collavuraturs. Cuminaivlamain s'engaschan ellas ed els, per che nossa populaziun possia viver e lavurar er en l'avegnir en in chantun segir e per ch'ils numerus giasts da vacanzas sco er las numerusas persunas che sa participeschan als congress sa sentian segirs en il Grischun. La Polizia chantunala procura per quietezza ed urden, persequitescha malfatgs, gida en cas da basegn e porscha cussegliaziun. En il chantun svizzer cun la pli gronda surfatscha è la Polizia chantunala da tut temp pronta da porscher agid, surpigliar acziuns da salvament, far retschertgas, cumbatter la criminalitad e prender mesiras da prevenziun.

Fotografia:

Infurmaziuns:

• Il cusseglier guvernativ Peter Peyer, schef dal Departament da giustia, segirezza e sanadad, stat a disposiziun per dumondas en il rom da l'inscunter regular cun las medias dals 8 da settember 2026
• Ulteriuras dumondas da las medias vegnan coordinadas dal Post da medias dal Departament da giustia, segirezza e sanadad, tel. +41 81 257 27 09, e‑mail medienstelle@djsg.gr.ch

Responsabladad: Regenza