Sin invitaziun da la Regenza grischuna ha la Regenza dal chantun Glaruna visità ier ed oz il chantun Grischun.

A chaschun da sia visita en il chantun Grischun è la delegaziun dal Glaruna vegnida manada dal president da la Regenza, il landamma Markus Heer. El è vegnì accumpagnà da la vicepresidenta da la Regenza Marianne Lienhard, dals cussegliers guvernativs Thomas Tschudi, Christian Marti e Kaspar Becker sco er dal chancelier Arpad Baranyi.

Suenter il bainvegni uffizial dals giasts tras la Regenza cumpletta en la Chasa grischa a Cuira èn las duas delegaziuns viagiadas ier a Filisur per visitar il viaduct da la Landwasser. Cun il bus d'oldtimer èsi lasuenter ì vinavant a Monstein per visitar la bieraria BierVision Monstein SA. L'ultima staziun dal di è stada la Schatzalp, nua ch'ils giasts han la finala pernottà en il Hotel Schatzalp.

Il di dad oz ha cumenzà cun ina visita da l’Institut da perscrutaziun AO. Alura èn las duas delegaziuns viagiadas cun il bus fin al Museum da Kirchner per visitar il museum e tadlar in referat dal prof. dr. Rico Franc Valär davart l'impurtanza dal rumantsch e dal talian en il chantun Grischun. Avant che returnar en il chantun Glaruna ha in gentar cuminaivel cumplettà la visita.

La visita da la regenza dal chantun Glaruna serva en emprima lingia a tgirar las relaziuns amicablas ed a barattar experientschas sin ils champs da la cultura, da l'economia e da la politica.

Fotografias:

Infurmaziuns:

President da la Regenza Martin Bühler, schef dal Departament da finanzas e vischnancas, e‑mail Martin.Buehler@dfg.gr.ch

Responsabel: Regenza