La Regenza ha concludì da sa participar a la cunvegna tranter la Confederaziun ed ils chantuns davart la corporaziun «justitia.swiss». Cun la participaziun stgaffescha il chantun Grischun ina premissa, per che la Confederaziun ed ils chantuns possian fundar la corporaziun «justitia.swiss». Il chantun metta uschia ina emprima basa per la digitalisaziun da la giustia.

Cun la Lescha federala davart las plattafurmas per la communicaziun electronica en il sectur giudizial (LPCEG) ha la Confederaziun stgaffì la basa legala per digitalisar la giurisdicziun civila e penala sco er las proceduras administrativas federalas. La finamira da la LPCEG èsi da guidar las dretgiras en l'avegnir digital, da facilitar l'access a la giustia e d'accelerar las proceduras giudizialas. Per cuntanscher questas finamiras vegnan las autoritads giudizialas obligadas da gestiunar actas electronicas e da communitgar cun las persunas participadas a proceduras sur ina plattafurma electronica.

Plattafurma survesaivla per la correspundenza giuridica electronica
La Confederaziun ed ils chantuns collavuran dapi l'onn 2016 per stgaffir las basas giuridicas e tecnicas per digitalisar il sectur giudizial. En il rom da questas lavurs han els particularmain sviluppà ina plattafurma survesaivla per la correspundenza giuridica electronica ch'è extremamain segira e standardisada. Sur questa plattafurma pon las persunas ch'èn participadas a proceduras civilas e penalas sco er a proceduras da la giurisdicziun administrativa en l'avegnir far inoltraziuns, prender invista d'actas e barattar en moda segira documents. Grazia a questa plattafurma naziunala èsi pussaivel da trair a niz sinergias, concentrar las resursas e meglierar l'access a la giustia.

En l'avegnir duai la corporaziun «justitia.swiss» gestiunar e sviluppar vinavant questa plattafurma. La premissa è che la Confederaziun ed almain 18 chantuns ratifitgeschian la cunvegna «justitia.swiss». Sche questa premissa vegn ademplida, èsi a partir dal 1. da fanadur 2027 previsiblamain pussaivel da cuntanscher las autoritads giudizialas dal chantun Grischun sur la plattafurma.

Infurmaziuns:

• Cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01 (cuntanschibel da las 13.00 fin las 14.00), e‑mail Medienstelle@djsg.gr.ch
• Remo Cavegn, president da la Dretgira superiura dal chantun Grischun, tel. +41 81 257 39 90, e‑mail Medien.org@gr.ch

Responsabladad: Regenza