Dals 23 fin ils 25 da settember sco er dals 29 da settember fin il 1. d'october vegnan fatgas lavurs da rumir crappa sin la via dal Malögia a Segl Baselgia. Per motivs da segirezza è la via serrada temporarmain durant las lavurs. Ella vegn averta per il traffic mintgamai a las uras entiras per 15 minutas.

La via da Malögia tranter Segl Föglias e Plaun da Lej è situada en il sectur da privel da numerus laviners ed è exposta durant la stad ad in ristg pli grond da bovas e crudadas da crappa. L'ultima giada èn sa distatgads ils 14 da zercladur 2026 plirs crappuns a Segl Baselgia ed èn crudads giu sin la via chantunala. Il lieu da privel direct è lura vegnì segirà e la via è puspè vegnida averta per il traffic. En la zona da distatga pertutgada datti dentant anc dus secturs cun crappa lucca.

Rumir la crappa a maun
Per motivs da segirezza rumescha l'Uffizi da construcziun bassa la crappa a maun en quests secturs. Cun allontanar ils crappuns pli gronds èsi pussaivel che singuls craps crodan fin giu sin via. Per quest motiv na pon ins betg far las lavurs durant ch'il traffic circulescha.

Las consequenzas per il traffic en detagl
Las lavurs vegnan fatgas ils suandants dis:

• mesemna, ils 23, fin venderdi, ils 25 da settember 2026
• mardi, ils 29 da settember, fin gievgia, il 1. d'october 2026
• La via è mintgamai serrada da las 8.15 fin las 12.00 e da las 13.15 fin las 17.00 (il venderdi mo l'avantmezdi da las 8.15 fin las 12.00).
• Mintgamai a las uras entiras po il traffic circular durant 15 minutas. Silsuenter vegn rumida la crappa durant var 45 minutas.

Il traffic public cursescha durant quest temp tenor l'urari usità e vegn svià sur Segl Maria – uschia er il traffic plaun. Las intervenziuns da las organisaziuns a glisch blaua èn garantidas da tut temp: En cas d'in eveniment po la via da Malögia vegnir averta entaifer curt temp per vehichels d'intervenziun.

Divergenzas èn pussaivlas
La segirezza da las collavuraturas e dals collavuraturs sco er da tut las participantas ed ils participants dal traffic ha adina emprima prioritad. Perquai ch'i vegn lavurà sut cundiziuns pretensiusas en in terren spundiv ch'è periclità da crudadas da crappa, poi dar divergenzas.
Termins da reserva en cas da mal'aura èn: dals 6 fin ils 8 d'october / dals 13 fin ils 15 d'october.

Fotografias agiuntadas:

Maletg 1: In dals dus lieus da distatga ch'èn da rumir.

Maletg 2: Zona da distatga sur la via da Malögia a Segl Baselgia.

Infurmaziuns:

• Reto Knuchel, inschigner chantunal, Uffizi da construcziun bassa, tel. +41 81 257 37 01 (cuntanschibel da las 13.00 fin las 14.00), e‑mail Reto.Knuchel@tba.gr.ch
• Christoph Naenni, manader dal sectur Geologia e privels da la natira, Uffizi da construcziun bassa, tel. +41 81 257 38 33 (cuntanschibel da las 09.00 fin las 11.00), e‑mail Christoph.Naenni@tba.gr.ch

Responsabladad: Uffizi da construcziun bassa