L'Uffizi da construcziun bassa fa lavurs da construcziun urgentas sin la Via sursilvana da la vart dretga dal Rain, sin il tschancun tranter Zault e Spitg en la Ruinaulta. Perquai sto la via vegnir serrada dals 11 fin ils 30 d'october 2026 mintgamai durant la notg. Questas serradas valan er per pedunas e peduns sco er per ciclistas e ciclists. Durant la fin d'emna resta la via charrabla sco usità. Il traffic vegn svià sur Flem.

L'Uffizi da construcziun bassa fa lavurs da reparaziun e da sanaziun urgentamain necessarias sin la Via sursilvana da la vart dretga dal Rain, quai sin in traject da var 30 meters tranter Zault e Spitg. I vegn reparà e sanà il mir da sustegn da pais da la vart da la val sco er il trassé da la via.

L'Uffizi da construcziun bassa nizzegia las serradas da la via da las proximas emnas per exequir lavurs preliminaras per la serrada totala la primavaira 2027. Durant che la via è serrada la notg, vegn installada ina punt auxiliara temporara per surmuntar il tschancun che sto vegnir sanà. Plinavant vegn remplazzada la curuna dal mir da sustegn.

Serradas durant la notg l'october 2026

• Dumengia, ils 11, fin venderdi, ils 16 d'october, mintgamai da las 20.00 fin las 05.00
• Dumengia, ils 18, fin venderdi, ils 23 d'october, mintgamai da las 20.00 fin las 05.00
• Dumengia, ils 25, fin venderdi, ils 30 d'october, mintgamai da las 20.00 fin las 05.00

La via è serrada mintgamai durant la notg da la dumengia saira fin il venderdi en damaun. Las participantas ed ils participants dal traffic pon sviar sur Flem. Durant la fin d'emna (venderdi saira fin sonda saira) resta la via charrabla sco usità. Ciclistas e ciclists sco er pedunas e peduns na pon betg passar il plazzal.

Fotografias agiuntadas:

Maletg 1: Survista da la Via sursilvana da la vart dretga dal Rain sin il traject tranter Zault e Spitg

Maletg 2: Extract dal plan d'ina punt auxiliara

Maletg 3: Survista dal perimeter dal project per lavurs anticipadas l'october 2026 e per la serrada totala da la via tras la Ruinaulta durant il favrer e mars 2027

Maletg 4: Mir da sustegn 45 00 727 che vegn segirà l'october 2026 cun serrar la via durant la notg e che vegn traversà temporarmain cun ina punt auxiliara

Infurmaziuns:

Marcel John, manader Mantegniment da las vias, tel. +41 81 257 37 54 (cuntanschibel da las 10.00 fin las 11.00), e‑mail Marcel.John@tba.gr.ch

Responsabladad: Uffizi da construcziun bassa