La Regenza ha concedì al Club da ballape Tusaun / Cazas ina contribuziun da maximalmain 159 300 francs or da la finanziaziun speziala Sport per construir ina plazza da ballape cun pastget artifizial en il territori Sogn Martegn a Cazas. Ils custs totals da quest project èn calculads cun 1,7 milliuns francs.

Per il Club da ballape Tusaun / Cazas giogan actualmain var 350 uffants e giuvenils sco er 130 persunas creschidas en var 30 equipas. Per tut las giugadras ed ils giugaders stattan actualmain a disposiziun memia paucas pussaivladads per trenar. Pervia da las cundiziuns meteorologicas na pon ultra da quai las plazzas existentas cun pastget natiral betg vegnir duvradas da tut temp en moda optimala. Per ils trenaments va a perder temp prezius, perquai che las plazzas ston vegnir serradas temporarmain durant periodas da plievgia pli lungas e per in temp pli lung durant ils mais d'enviern.

Infurmaziuns: Departament d'educaziun, cultura e protecziun da l'ambient

La Regenza ha approvà il project «Rempar da lavinas Giumella, cumplettaziun dal cugn da sparter lavinas Pighé, Rossa». Quest project cumplettescha in rempar da lavinas ch'è vegnì realisà en il territori Giumella gia ils onns 2017 fin 2025. Il rempar dueva reducir la periclitaziun tras lavinas uschè fitg, ch'igl avess dà maximalmain intensitads mesaunas en il territori d'abitadi en cas d'in scenari da 100 e 300 onns. Suenter che las lavurs da construcziun èn stadas a fin, è la periclitaziun tras lavinas vegnida giuditgada da nov en l'entir territori da rempars. Igl è sa mussà che l'areal d'abitadi oriundamain periclità en il territori Pighé fiss vinavant pertutgà da quest scenari. Il motiv: La situaziun dal guaud è sa midada en il territori da privel, uschia ch'il guaud na po betg pli franar uschè bain la lavina.

Cun cumplettar il project duai ussa il crest natiral existent al vest dal territori d'abitadi Pighé vegnir auzà e concepì sco cugn che sparta lavinas. Tras la midada dal project resultan custs supplementars da 345 000 francs. Per quest intent ha la Regenza garantì ina contribuziun da maximalmain 265 650 francs. La cumplettaziun dal project duai vegnir realisada l'atun 2026.

© tur gmbh

Infurmaziuns: Departament d'infrastructura, energia e mobilitad

La Regenza ha approvà il project «Aula nel Bosco» da la vischnanca da Roveredo ed ha garantì ina participaziun unica da 30 000 francs per construir ina stanza da scola en il guaud. Ils custs totals èn calculads cun 84 000 francs. Il project cumpiglia la realisaziun d'in edifizi da lain che po vegnir duvrà per differents intents.

La chamona da guaud duai servir en emprima lingia sco lieu da scolaziun e da furmaziun supplementara per la scolina e la scola primara da la vischnanca da Roveredo. Las utilisadras ed ils utilisaders da la «Aula nel Bosco» duain vegnir sensibilisads per ils temas guaud, natira e cuntrada. Per occurrenzas commerzialas na stat la «Aula nel Bosco» betg a disposiziun.

Infurmaziuns: Departament d'infrastructura, energia e mobilitad

La Regenza ha prendì enconuschientscha dal fatg che Martin Keiser sorta ils 30 da settember 2026 da la Cumissiun da privel. La Regenza engrazia ad el per la lavur prestada. Sco nov commember da la Cumissiun da privel per la durada d'uffizi dal 1. d'october 2026 fin a la scadenza da la perioda d'uffizi ordinaria ils 30 da zercladur 2030 è vegnì elegì Gian Cla Feuerstein, ch'è domicilià a Samedan.

Infurmaziuns: Departament d'infrastructura, energia e mobilitad