La Regenza ha
prendì posiziun tar in project da consultaziun dal Departament federal per
ambient, traffic, energia e communicaziun (DATEC) che ha l'intent da satisfar
als basegns da mobilitad resguardond tut ils meds da traffic. Cun il project
«Traffic '45» vul il Cussegl federal planisar a lunga vista l'ulteriur
svilup da l'infrastructura da traffic ed impunder ils meds finanzials
disponibels cun cleras finamiras.
La Regenza
renconuscha il basegn d'agir e beneventa da princip l'idea da priorisar las
investiziuns là, nua ch'ellas contribueschan fermamain a la capacitad da
prestaziun, a la segirezza dal provediment, a la cuntanschibladad sco er a la
robustadad ed a la resilienza dal sistem da traffic. Ella pretenda dentant da
resguardar pli fitg las premissas spezialas dals chantuns da muntogna cun
grondas distanzas, ina topografia pretensiusa, grondas variaziuns stagiunalas
da l'intensitad dal traffic e per part senza pussaivladads da guntgir.
En spezial
pretenda la Regenza da dar dapli prioritad als projects da las vias naziunalas
N13 tranter Rehanau e Giuvaulta (Isla Bella) ed N29 pertutgant il sviament da
Beiva. La N13 sur il San Bernardin è ina colliaziun centrala tranter il nord ed
il sid ed ha ina funcziun impurtanta per la segirezza dal provediment e la
cuntanschibladad dal Grischun. E la via dal Güglia è la pli impurtanta
colliaziun stradala ch'è averta durant l'entir onn per l'Engiadin'Ota. Perquai
pretenda la Regenza d'anticipar l'Isla Bella en l'orizont da realisaziun 2055
ed il sviament da Beiva en l'orizont da realisaziun 2045. Areguard
l'infrastructura da viafier s'engascha la Regenza per la promoziun dal nov
trassé Fideris–Küblis sco er da la nova cruschada Li Foppi sin la lingia dal
Bernina. Plinavant duai la projectaziun da l'amplificaziun dal traject en il
territori Tiefenwinkel al Lai Rivaun cun in segund binari nuninterrut restar
ina part integrala respectivamain vegnir reintegrada sco part integrala en la
planisaziun da l'infrastructura da viafier. Il traject existent d'in binari è
en quest lieu ina stretga sin la colliaziun ferroviara impurtanta tranter il
Grischun e la Svizra Bassa.
Per il traffic
d'aglomeraziun pretenda la Regenza tranter auter, ch'il program vegnia separà
dals conclus davart las infrastructuras grondas da la viafier e da la via
naziunala sco er ch'il «Traffic en direcziun unica Welschdörfli» vegnia integrà
en moda adequata en in pachet cun mesiras che vegnan finanziadas cun agid da
pauschalas.
Consultaziun dal Departament federal per ambient, traffic, energia e communicaziun (DATEC)
Infurmaziuns: Departament d'infrastructura, energia e
mobilitad