La Cuminanza da lavur da las regiuns alpinas (ARGE ALP) vul s'engaschar concretamain en ils suandants secturs: midada energetica, provediment d'aua resilient en il territori alpin e futur da l'agricultura da muntogna. Quai ha concludì la 57. Conferenza da las scheffas e dals schefs da las regenzas cun trais resoluziuns.
La 57. Conferenza da las scheffas e dals schefs da las regenzas da la ARGE ALP a Bregenz è stada oz avantmezdi il punct culminant e la finiziun da l'onn presidial dal Vorarlberg. Il guvernatur Markus Wallner ha surdà il presidi ussa a la Baviera.
Commembers da la ARGE ALP concludan trais resoluziuns
Tras la deliberaziun da trais resoluziuns a chaschun da la Conferenza da las scheffas e dals schefs da las regenzas han ils commembers da la ARGE ALP rinforzà lur collavuraziun transcunfinala. Cun la resoluziun «Midada energetica en la ARGE ALP – contribuziun a l'autonomia energetica da l'Europa» decidan las scheffas ed ils schefs da las regenzas da la ARGE ALP tranter auter d'extender ils purtaders d'energia regenerabla sco er las raits d'electricitad e d'idrogen, da sminuir impuls cuntraproductivs e da concepir la midada energetica en moda sociala. Els vulan rinforzar la collavuraziun en quest sectur e contribuir uschia a l'autonomia energetica da l'Europa.
La resoluziun «Provediment d'aua resilient en il territori alpin» tracta las resursas d'aua en il territori alpin. I na sa chapescha betg da sez che la resursa aua stat a disposiziun en in'auta qualitad, en ina quantitad suffizienta e per pretschs commensurads. Ils stadis commembers da la ARGE ALP s'engaschan per che quai restia garantì er per las generaziuns futuras. La finala è in provediment d'aua bun e segir decisiv per il spazi da viver e per il spazi economic.
Cun la resoluziun «Futur da l'agricultura da muntogna en il territori alpin» han las scheffas ed ils schefs da las regenzas concludì tranter auter da cuntinuar cun ina politica agrara autonoma e dotada suffizientamain per l'agricultura da muntogna sco er da promover l'agricultura giuvna e la midada da generaziun.
Agiuntas:
Resoluziun «Midada energetica en la ARGE ALP – contribuziun a l'autonomia energetica da l'Europa»
Resoluziun «Provediment d'aua resilient en il territori alpin»
Resoluziun «Futur da l'agricultura da muntogna en il territori alpin»
Fotografia:
Las scheffas ed ils schefs da la cuminanza da lavur da las regiuns alpinas (ARGE ALP): da sanestra President da la regenza Martin Bühler (Grischun), Alexander Mayer (Chanzlia chantunala da Baviera), guvernatur Anton Mattle (Tirol), eguvernatur Arno Kompatscher (Tirol dal sid), guvernatur Markus Wallner (Vorarlberg), cusseglier guvernativ Norman Gobbi (Tessin), presidenta dal parlament Brigitta Pallauf (Salzburg), president Maurizio Fugatti (Trentino), cusseglier guvernativ Marc Mächler (Son Gagl), Milvia Scurti (Lumbardia)
© Stadi federativ Vorarlberg/7ProTV
Infurmaziuns:
President da la Regenza Martin Bühler, schef dal Departament da finanzas e vischnancas, e‑mail Martin.Buehler@dfg.gr.ch
Responsabladad: Regenza