L'Uffizi da construcziun bassa allontanescha grippa sur la via dal Pass dal Fuorn durant las quatter notgs da glindesdi, ils 2 da november fin venderdi, ils 6 da november 2026. Per quest intent sto la via tranter Falla da l'Uors e Punt la Drossa vegnir serrada mintgamai dal tuttafatg durant la notg.
L'Uffizi da construcziun bassa (UCB) allontanescha grippa sin il traject Falla da l'Uors fin Punt la Drossa. Allontanads vegnan in grip surpendent ed in grip pli grond che smanatscha da crudar. Ultra da quai vegn la crappa lucca sur la via rumida a maun. Las lavurs èn necessarias per reducir il privel da crudadas da crappa e per garantir la segirezza da las participantas e dals participants dal traffic sco er da las lavurs da mantegniment vi da la via ch'èn planisadas ils proxims onns.
Serradas durant la notg e sviament
Las lavurs preparatoricas vegnan fatgas gia ordavant durant ch'il traffic circulescha sin in vial. L'installaziun dal plazzal per rumir la grippa cumenza ils 2 da november 2026 durant il di. En quest connex poi dar curts temps da spetga da mintgamai maximalmain 15 minutas.
Per rumir la grippa sto la via dal Pass dal Fuorn tranter Falla da l'Uors e Punt la Drossa vegnir serrada durant la notg per tut il traffic da glindesdi, ils 2 da november fin venderdi, ils 6 da november 2026. Las serradas èn accordadas cun l'ultim passadi dals meds da transport publics e duran da las 21.30 fin las 5.00. Il sviament da ed en la Val Müstair maina sur la via dal Reschen ed è signalisà al lieu.
Infurmaziuns actualas sin strassen.gr.ch
Las lavurs dependan da l'aura. Las participantas ed ils participants dal traffic vegnan supplitgads da resguardar las uras che la via è serrada e da planisar correspundentamain lur viadis.
Fotografias agiuntadas:
Maletg 1: Il grip surpendent vegn allontanà.
Maletg 2: Il grip che smanatscha da crudar vegn allontanà.
Maletg 3: Survista dal traject da la via
Maletg 4: Lavurs da rumida dal 2025
Persuna che dat infurmaziuns:
Rafael da Silva, schef dal district 4 Scuol, Uffizi da construcziun bassa, tel. +41 81 257 69 57 (cuntanschibel da las 09.30 fin las 11.30), e‑mail Rafael.DaSilva@tba.gr.ch
Responsabladad: Uffizi da construcziun bassa