Sin invit da la Regenza ha l'ambassadura franzosa Marion Paradas visità oz il chantun Grischun.
L'ambassadura Marion Paradas è vegnida beneventada oz en la Chasa grischa a Cuira dal president da la Regenza Martin Bühler, dal chancelier Daniel Spadin e da l'incumbensà per relaziuns externas Dominik Hemmi. L'ambassadura è vegnida accumpagnada da Laurent Alberti, consul general franzos a Turitg, dad Etienne Oudot de Dainville, manader da la partiziun Economia da l'ambassada e dad Alyssia Biton, emprima secretaria da l'ambassada. Suenter il barat dals salids uffizials è in gentar cuminaivel stà sin il program.
La Regenza grischuna tgira annualmain contacts cun represchentantas e represchentants da stadis esters en Svizra. Ils discurs èn elements impurtants da las relaziuns externas dal chantun. Cun ils stadis vischins e cun ils pajais che han relaziuns spezialas cun la Svizra e cun il Grischun vegnan savens discutadas dumondas specificas actualas. Autras visitas servan en emprima lingia a barattar experientschas sin il champ cultural, economic e politic.
Fotografia:
Da sanestra a dretga: chancelier Daniel Spadin, Alyssia Biton, Laurent Alberti, ambassadura Marion Paradas, president da la Regenza Martin Bühler, Etienne Oudot de Dainville e Dominik Hemmi
Infurmaziuns:
President da la Regenza Martin Bühler, schef dal Departament da finanzas e vischnancas, E‑Mail Martin.Buehler@dfg.gr.ch
Responsabladad: Regenza