La Regenza ha concludì da prolungar l'incarica da prestaziun cun l'uniun Grischun Vacanzas e concedì contribuziuns chantunalas per manar vinavant la campagna da marca cun ils famus capricorns «Gian e Giachen». Ultra da quai ha ella approvà contribuziuns chantunalas per meglierar l'infrastructura da velo tranter Domat e Cuira, per sanar la Scola-dimora Cuira sco er per organisar l'exposiziun professiunala FIUTSCHER.
Contribuziuns chantunalas per promover il turissem grischun
La Regenza ha concedì a l'uniun Grischun Vacanzas (GRV) – sin basa dal sboz da l'incarica da prestaziun per ils onns 2027 fin 2030 – ina contribuziun chantunala da 6,5 milliuns francs per las activitads da Grischun Vacanzas. Per realisar la «internaziunalisaziun dals martgads» ha la Regenza empermess a l'uniun GRV da pajar mintg'onn supplementarmain ina contribuziun chantunala dad 1 milliun francs.
Areguard las plazzas da lavur ed areguard la valurisaziun vala il turissem vinavant sco ina da las pli impurtantas pitgas da l'economia publica dal Grischun. L'augment da la cumpetitivitad dal turissem grischun en la cumparegliaziun internaziunala sco er il rinforzament da la forza innovativa da l'economia turistica ha er en l'avegnir ina fitg gronda impurtanza. Sco organisaziun che promova la dumonda per il turissem grischun gioga Grischun Vacanzas en quest connex ina rolla centrala per las activitads da commerzialisaziun che cumpiglian pliras destinaziuns e che s'orienteschan als giasts. Correspundentamain èsi tenor la Regenza fitg impurtant, che Grischun Vacanzas saja er en l'avegnir in'organisaziun turistica effizienta cun in ferm focus sin partenadis (collavuraziun tranter las destinaziuns), cumpetenzas (orientaziun als products) ed innovaziun (orientaziun als giasts) e che l'uniun gioghia ina rolla relevanta en il turissem grischun.
© Grischun Vacanzas / Marco Hartmann
Infurmaziuns: Departament d'economia publica e fatgs socials
La Regenza ha concedì a l'uniun Grischun Vacanzas (GRV) – sin basa dal sboz da l'incarica da prestaziun per ils onns 2027 fin 2030 – ina contribuziun chantunala da 6,5 milliuns francs per las activitads da Grischun Vacanzas.
Da la marca turistica a la marca dal lieu: Gian e Giachen vinavant en acziun per il Grischun
Al secretariat da la marca graubünden ed a l'uniun Grischun Vacanzas (GRV) ha la Regenza garantì sin basa da la Lescha per promover il svilup economic en il chantun Grischun da pajar mintg'onn ina contribuziun chantunala dad 1 milliun francs per realisar la campagna da marca «Enavant 2027–2030». Questa contribuziun vegn repartida sco suonda: Il secretariat da la marca graubünden è responsabel per la realisaziun da las mesiras en il sectur «betg turistic» cun mintg'onn 600 000 francs, l'uniun GRV è cumpetent per la realisaziun da las mesiras en il sectur «turistic» cun mintg'onn 400 000 francs.
Dapi l'onn 2007 vegn la marca graubünden distribuida sin il martgà sut il titel da campagna «Enavant» cun ils dus capricorns Gian e Giachen. Cun grond success, sco che differents studis da marcas sco er mesiraziuns annualas da l'efficacitad conferman. Durant ils emprims onns è il focus vegnì mess prioritarmain sin la communicaziun turistica. Cun orientar la marca a l'idea dal «Grischun sco metropola natirala» duai la percepziun vegnir extendida sistematicamain e midada en moda persistenta durant ils proxims onns – da la marca turistica a la marca dal lieu. Cun «Enavant» duai la posiziun differenzianta da la marca graubünden, ch'ins ha en mira, vegnir rinforzada ed extendida dal 2027 fin il 2030 cun agid da mesiras da communicaziun adattadas.
Infurmaziuns: Departament d'economia publica e fatgs socials
Al secretariat da la marca graubünden ed a l'uniun Grischun Vacanzas (GRV) ha la Regenza garantì da pajar mintg'onn ina contribuziun chantunala dad 1 milliun francs per realisar la campagna da marca «Enavant 2027–2030».
Ulteriur pass per ina ruta dal traffic da velos quotidian da Domat a Maiavilla
Las regiuns Plaun, Plessur e Landquart planiseschan ina colliaziun per il traffic da velo quotidian tranter Razén e Maiavilla. La Regenza ha ussa approvà la dumonda da la vischnanca da Domat e da la citad da Cuira concernent contribuziuns chantunalas per meglierar l'infrastructura da velo tranter la centrala da l'ovra electrica Rehanau a Domat ed il sutpassadi da la A13 sper il Plankis sco er per las mesiras da signalisaziun respectivas. Plinavant ha ella approvà la dumonda da la vischnanca da Domat d'integrar il traject da la via da velos tranter la centrala da l'ovra electrica Rehanau ed il sutpassadi Plong Muling en la rait da basa dal traffic quotidian dal Plan sectorial Velo dal Grischun sco er da dischlocar il traject en il sectur dal lavuratori communal. Als custs totals dal project ch'èn budgetads cun var 1,79 milliuns francs ha la Regenza garantì ina contribuziun chantunala da maximalmain 591 000 francs als petents. Ultra da quai sa participescha la Confederaziun cun 744 000 francs als custs dal project.
Cun differentas mesiras vul il project da cumplettaziun augmentar considerablamain la qualitad da la colliaziun da velo. Sin var 60 pertschient dal traject èsi tranter auter previs da renovar la cuvrida, da meglierar l'allontanament da l'aua e da schlargiar il vial. Cun construir ina nova rampa al sutpassadi Plong Muling sut la A13 vegn simplifitgà e scursanì il trassé, meglierada la circulaziun ed augmentada la segirezza. A las cruschadas vegnan plinavant fatgas marcaziuns da terren e las reglas da precedenza vegnan orientadas al traffic da velos.
Infurmaziuns: Departament d'infrastructura, energia e mobilitad
Las regiuns Plaun, Plessur e Landquart planiseschan ina colliaziun per il traffic da velo quotidian tranter Razén e Maiavilla.
Approvaziun e contribuziun chantunala per la sanaziun da la Scola-dimora Cuira
La Regenza ha approvà la dumonda da la fundaziun scola-dimora Cuira per contribuziuns da construcziun al project da sanaziun. Ultra da quai ha ella garantì a la fundaziun ina contribuziun chantunala da construcziun da maximalmain 2,95 milliuns francs en il senn da la Lescha chantunala davart las scolas popularas sco er da la Lescha chantunala d'integraziun da persunas cun impediments. Resalvada resta l'approvaziun dal credit tras il Cussegl grond.
La halla da gimnastica (dals onns 1980) sco er il foyer (dals onns 1960) da la fundaziun Scola-dimora Cuira han cuntanschì la fin da lur durada da vita. In stadi spezialmain critic han il tetg plat sur las gardarobas ed ils locals da fisio. Durant ils ultims 2 onns han las construcziuns survegnì pli e pli sfessas ch'èn vegnidas stuppadas provisoricamain u eliminadas cun agid da sistems da collecturs interns. Ultra da quai è l'isolaziun da cucun bletscha e n'ademplescha betg pli suffizientamain sia funcziun isolanta. Perquai prevesa il project da sanar il tetg plat principal en la curt interna, las paraids ed ils mirs exteriurs da la halla da gimnastica cun ils locals accessorics sco er la fatschada dal foyer.
© Sturzenegger Architektur
Infurmaziuns: Departament d'educaziun, cultura e protecziun da l'ambient
La Regenza ha approvà la dumonda da la fundaziun scola-dimora Cuira per contribuziuns da construcziun al project da sanaziun.
Contribuziun chantunala per l'exposiziun professiunala FIUTSCHER 2026
La Regenza garantescha a l'Uniun grischuna d'artisanadi e mastergn ina contribuziun chantunala da maximalmain 351 000 francs per l'exposiziun professiunala FIUTSCHER 2026 che ha lieu a Cuira. Ils custs totals da l'occurrenza vegnan calculads cun circa 1,3 milliuns francs.
L'exposiziun professiunala FIUTSCHER 2026 vegn organisada dals 11 fin ils 15 da november 2026 a Cuira. Quest onn ha ella lieu per ina giada extraordinariamain. Cun questa ediziun supplementara duai vegnir restabilì il turnus alternant da l'exposiziun FIUTSCHER e da l'occurrenza centrala SwissSkills. Quest turnus era vegnì interrut pervia da la pandemia da COVID-19. A chaschun da l'exposiziun da quest onn preschentan ca. 90 expositurs tut en tut 185 emprendissadis sco er passa 310 furmaziuns supplementaras che vegnan purschids en il Grischun. Ils organisaturs quintan cun var 16 000 visitadras e visitaders. Cun la qualificaziun per ils EuroSkills en la professiun lainari / lainaria ha danovamain lieu ina concurrenza professiunala a la FIUTSCHER. L'exposiziun vegn organisada da l'Uniun grischuna d'artisanadi e mastergn en collavuraziun cun l'Uffizi per la furmaziun professiunala dal Grischun ed ha lieu per l'emprima giada en la nova halla d'events Areon.
© Bündner Gewerbeverband
Infurmaziuns: Departament d'educaziun, cultura e protecziun da l'ambient
La Regenza garantescha a l'Uniun grischuna d'artisanadi e mastergn ina contribuziun chantunala da maximalmain 351 000 francs per l'exposiziun professiunala FIUTSCHER 2026 che ha lieu a Cuira.
