A partir dal november 2026 introducescha il chantun Grischun in nov corporate design (CD). Cun la nova apparientscha rinforza il chantun sia identitad visuala e creescha ina cumparsa moderna ed unitara sur tut ils chanals da communicaziun. L'introducziun dal nov CD vegn fatga pass per pass.
Cun introducir il nov corporate design (CD) survegn l'administraziun chantunala ina cumparsa visuala moderna, unitara ed orientada al futur. La nova apparientscha rinforza la reconuschibilitad dal chantun e procura per ina communicaziun opticamain consistenta sur tut ils chanals analogs e digitals.
Il nov CD dal chantun Grischun collia l'autonomia e diversitad dal chantun cun la pli gronda surfatscha cun in design cler e modern. El suttastritga avertadad, fidadadad e forza innovativa e gida a rinforzar l'identitad dal chantun vers anen e vers anora. La nova apparientscha procura per ina cumparsa unitara, porscha dentant a medem temp avunda flexibilitad per tegnair quint adequatamain dals differents basegns da communicaziun dals singuls posts da servetsch chantunals.
Il nov logo s'orientescha a la vopna chantunala ed unescha las vopnas da las anteriuras Trais Lias. Il logo marchescha sco maletg tut ils meds da communicaziun da l'administraziun chantunala. Cumplettà vegn il logo cun ina paletta da colurs moderna ed ina tipografia bain legibla, che adempleschan las pretensiuns d'ina communicaziun digitala.
L'introducziun dal nov CD vegn fatga pass per pass
L'introducziun dal nov CD vegn fatga en in process da plirs stgalims. En in emprim pass vegnan tut ils documents e tut las publicaziuns adattads al nov CD. Quai èn per exempel brevs, rapports, disposiziuns, broschuras u placats che vegnan applitgads en l'entira administraziun ed er drizzads vers anora. Er en ina emprima fasa vegnan adattads ils chanals da social media dal chantun sco er l'inscripziun dals pli impurtants edifizis administrativs. A partir dal cumenzament da november 2026 vegn tut quai a cumparair cun il nov CD.
En in segund pass vegn la nova pagina d'internet dal chantun adattada al nov CD. Actualmain vegn ella reelavurada en moda cumplessiva. A partir da la fin da mars 2027 vegn ella lura a star a disposiziun a la publicitad en in nov vestgì.
En in terz pass vegnan tut las autras applicaziuns adattadas successivamain a la nova apparientscha. Latiers tutgan en spezial documents interns da l'administraziun, sco directivas e fegls d'infurmaziun ed er formulars main impurtants. Er pir pli tard vegnan adattads la vestgadira da lavur, ils vehichels sco er ils edifizis administrativs main frequentads.
Cun il nov CD metta il chantun Grischun in segn visibel per in'administraziun moderna. La nova apparientscha cumbinescha tradiziun ed avegnir e creescha la basa per ina cumparsa ferma e reconuschibla – oz ed en l'avegnir.
Novas designaziuns per unitads administrativas
Cura ch'il nov CD vegn introducì pass per pass, il cumenzament da november 2026, survegnan a medem temp circa ina dunsaina d'unitads administrativas in nov num. Quai cun la finamira da simplifitgar e d'unifitgar las designaziuns da las unitads administrativas.
Agiunta:
Novs nums d'unitads administrativas
Infurmaziuns:
Daniel Spadin, chancelier, Chanzlia chantunala, tel. +41 81 257 22 23 (cuntanschibel da las 14.00 fin las 15.30), e‑mail Daniel.Spadin@staka.gr.ch
Responsabladad: Chanzlia chantunala