Las tecnologias digitalas èn ina part fixa da las relaziuns famigliaras e colleghialas d'ozendi. Entant ch'ellas porschan a nus novas vias da communicaziun e d'approximitad, pon ellas a medem temp er stgaffir zonas per controllar, survegliar e commetter violenza. Per quest motiv sa deditgeschan ils Dis d'acziun cunter violenza a chasa en il chantun Grischun quest onn al tema «violenza digitala». A prà cun il tema han lieu dals 25 da november fin ils 10 da december 2026 bleras occurrenzas en l'entir chantun.

Violenza a chasa n'enconuscha nagins cunfins geografics, culturals u socials. Ella vegn avant en differentas furmas – corporala, sexuala, psichica ed economica – e pertutga persunas entaifer la famiglia u exista tranter partenaris (anteriurs). Violenza a chasa n'è betg ina chaussa privata – ella è chastiabla e na vegn betg tolerada en nossa societad.

La violenza digitala ha bleras fatschas
Quest onn metta il Grischun in focus spezial sin la violenza digitala. Questa furma da violenza n'è betg in fenomen autonom, mabain per il pli la cuntinuaziun ed il rinforzament da relaziuns da violenza existentas. Quai pon per exempel esser la mulesta permanenta tras notizias e telefonats betg giavischads, la surveglianza secreta per localisar ina persuna cun agid d'apparats da GPS, trackers da bluetooth ed apps da surveglianza sco er l'access senza permissiun a contos dad e mail, banca u social media. In'ulteriura furma è la violenza che sa basa sin maletgs. En quest cas vegnan cuntegns intims originals u generads cun intelligenza artifiziala derasads senza consentiment. A violenza digitala pon las persunas pertutgadas esser exponidas di e notg. La separaziun fisica na protegia betg, perquai che smanatschas e mulestas entran da tut temp en la sfera privata.

Differentas occurrenzas en l'entir chantun
Ils Dis d'acziun cunter violenza a chasa duain sensibilisar per las differentas furmas da violenza en partenadis e famiglias, dar impuls da discurrer e render attent a purschidas d'agid e da sustegn.

En l'entir chantun han lieu occurrenzas ed acziuns: referats davart violenza digitala, preschentaziuns da musica e da films, cursas d'orientaziun cun posts interactivs en differentas regiuns, purschidas per giuvenils e geniturs, furmaziuns supplementaras per persunas spezialisadas e per finir in gieu da hockey da benefizi da las HCD Ladies cunter las SCB Frauen a favur da la Chasa da dunnas dal Grischun. Plinavant vendan differentas pasternarias e butias en l'entir chantun lur paun en stgarnuzs spezials, sin stans d'infurmaziun datti in punsch ed infurmaziuns davart purschidas d'agid, ina installaziun d'art renda visibels ils femicidis e numerus edifizis glischan oransch. Cumplementarmain fa ina campagna chantunala attent al tema, quai cun slogans sco «La violenza n'è betg privata», e sin social media gira parallelamain ina campagna interchantunala davart violenza psichica e digitala.

Agid e sustegn disponibel
Bleras victimas taschan per tema u per vargugna. Er ils confamigliars e l'ambient social na san savens betg, co ch'els duain reagir. En il chantun Grischun datti bleras purschidas d'agid e da sustegn per persunas pertutgadas e per confamigliars. Questas purschidas duain vegnir rendidas enconuschentas durant ils dis d'acziun:

• En privel acut: polizia 117, clom d'agid sanitar 144
• Agid a victimas dal Grischun: cussegliaziun gratuita, confidenziala e sin giavisch anonima per dunnas, umens, uffants e giuvenils ch'èn pertutgads da violenza: tel. +41 81 257 31 50, e‑mail opferhilfe@soa.gr.ch
• Numer 142: il numer curt svizzer da l'Agid a victimas, cuntanschibel durant 24 uras, gratuit e confidenzial
• Chasa da dunnas dal Grischun: protecziun, alloschi e cussegliaziun per dunnas pertutgadas da violenza e lur uffants, cuntanschibla durant 24 uras sut tel. +41 81 252 38 02
• Post da cussegliaziun per persunas violentas: sustegn gratuit e confidenzial per persunas ch'èn violentas u teman da daventar violentas. tel. +41 79 544 38 63, e‑mail gewaltberatungsstelle@gr.ch
• Uffants e giuvenils: cussegliaziun durant 24 uras sur il numer 147 (Pro Juventute)

Ina survista da tut las purschidas en 16 linguas è disponibla sut www.gr.ch/haeusliche-gewalt e sut www.findhelp.gr.ch.

Agiunta:

Tut las acziuns ed occurrenzas en il program dals Dis d'acziun 2026

Fotografia:

Campagna chantunala cunter violenza a chasa

Infurmaziuns:

Madlaina Baselgia, manadra dal Post da coordinaziun Violenza a chasa, Uffizi da fatgs socials, tel. +41 81 257 26 11, e‑mail Madlaina.Baselgia@soa.gr.ch

Responsabladad: Uffizi da fatgs socials

Dis d'acziun sin l'entir mund

Dals 25 da november, il Di internaziunal cunter la violenza envers dunnas, fin ils 10 da december, il Di dals dretgs umans, mettan differentas organisaziuns sin l'entir mund in signal per ina societad senza violenza. L'illuminaziun oranscha d'edifizis, ch'è visibla durant quests dis sin l'entir mund, è in signal simbolic cunter violenza.

Ils «Dis d'acziun cunter violenza a chasa en il Grischun» èn inspirads da las iniziativas dals dus moviments internaziunals «Orange Days» e «16 dis cunter violenza envers dunnas». Il chantun coordinescha e sustegna occurrenzas ed acziuns en las regiuns.