La Regenza ha concedì a la grizoon SA, en num da l'entira societad da purtaders da project, ina contribuziun chantunala da maximalmain 900 000 francs per il project digital «Smart Elderly Care Assistant». Ella ha deliberà questa contribuziun en il rom da la Lescha davart la promoziun da la transfurmaziun digitala en il Grischun. Per il project èn budgetads custs totals da var 1,99 milliuns francs.

Tenor la descripziun da la grizoon SA promova il project «Smart Elderly Care Assistant» ina transfurmaziun digitala en la tgira staziunara ed ambulanta da persunas attempadas e da lunga durada, quai cun sviluppar in partenari da discurs digital per persunas attempadas. Quest partenari da discurs digital sa basa sin l'intelligenza artifiziala e dovra la reconuschientscha vocala automatica sco er l'elavuraziun linguistica natirala per interagir cun empatia ed en moda situativa en lingua discurrida. La purschida sa drizza cunzunt a persunas cun demenza iniziala u pli avanzada. Il partenari da discurs digital identifitgescha ils basegns, reagescha en moda verbalmain adequata e cuntinuescha cun anteriurs discurs. La soluziun cumplettescha purschidas da tgira existentas ed etablescha novs process d'interacziun tranter persunas e la tecnologia en il sectur sensibel da la tgira da persunas attempadas.

Als purtaders da project appartegnan – ultra da la grizoon SA – la fundaziun Menzi-Jenny-Gertrud, il Center da senioras e seniors Rigahaus, la Chasa da burgaisas e burgais a Cuira, l'Abitadi per persunas attempadas Kantengut, la Spitex Cuira sco er la palliative gr. La grizoon SA surpiglia la direcziun generala e la realisaziun tecnica dal project..

Ulteriuras infurmaziuns: https://grdigital.digital

Infurmaziuns: Departament da giustia, segirezza e sanadad