A chaschun da ses onn presidial visita il president da la Regenza Martin Bühler scolas professiunalas spezialisadas e gimnasis en l'entir chantun. En quest connex sa focusescha el sin promover la participaziun politica da las persunas giuvnas. Sia finamira è da svegliar tar ils giuvenils l'interess da sa participar activamain als process politics.

Il president da la Regenza Martin Bühler visita quest onn las scolas professiunalas spezialisadas ed ils gimnasis da Poschiavo fin a Mustér. Quest'emna è el giast a la Scola chantunala a Cuira. Sco magister e politolog da professiun dat il president da la Regenza gist sez ina lecziun. Durant quell'ura d'instrucziun explitgescha el las particularitads da la democrazia directa en Svizra e mussa, co che las burgaisas ed ils burgais pon sa far valair en decisiuns politicas. Plinavant èn las scolaras ed ils scolars envidads da metter en discussiun temas che stattan a cor ad els e tar ils quals els giavischan midadas. Quai è per exempel dapli vacanzas per emprendistas ed emprendists, colliaziuns regiunalas da traffic public u la politica da clima. Ultra da quai tematisescha il president da la Regenza il svilup demografic en Svizra e quant fitg che las differentas gruppas da vegliadetgna sa participeschan a las votaziuns ed elecziuns. Qua sa mussi, quant impurtant ch'igl è, che gist persunas giuvnas sa participeschian activamain a las activitads politicas.

«Per che noss sistem politic funcziunia, dovri burgaisas e burgais engaschads. Durant mes onn presidial vi jau sensibilisar ils giuvenils per la politica ed als mussar, quant impurtanta ch'ina cooperaziun activa è, en spezial da persunas giuvnas», motivescha Martin Bühler sia iniziativa.

Fotografias:

Ulteriuras fotografias da las visitas da scola vegnan messas a disposiziun qua.

Infurmaziuns:

Responsabladad: Departament da finanzas e vischnancas