Cun la revisiun parziala da la lescha per promover la tgira da persunas malsaunas duain vegnir realisadas sin plaun da la lescha las mesiras cuntegnidas en il model directiv concernent l'organisaziun dal provediment da la sanadad en il chantun Grischun (www.djsg.gr.ch PUBLICAZIUNS).

Il sboz da revisiun cuntegna ils suandants puncts centrals:

• Per cuntanscher ina divisiun congruenta dal chantun per tut ils secturs dal provediment da la sanadad instituziunal vegnan furmadas regiuns da provediment da la sanadad. La divisiun actuala dal chantun Grischun en regiuns d'ospital vegn extendida sin il sectur da las chasas da persunas attempadas e da tgira sco er sin il sectur da la spitex.
• En mintga regiun da provediment duain las vischnancas appartegnentas constituir ina fundaziun, a la quala ils purtaders dals ospitals, da las chasas da persunas attempadas e dals servetschs da la tgira ed assistenza a chasa pon surdar la gestiun strategica ed operativa dal manaschi. En la regiun da provediment da la sanadad Val dal Rain grischuna duai vegnir constituida da las vischnancas da las subregiuns Plaun, Landquart e Plessur mintgamai ina fundaziun per quest intent.
• Ils purtaders dals ospitals, da las chasas da persunas attempadas e da tgira e dals servetschs da la tgira ed assistenza a chasa duain vegnir intimads cun impuls finanzials da surdar la gestiun strategica ed operativa da lur manaschis a la fundaziun da lur regiun da provediment da la sanadad.
• Prescripziuns dal legislatur concernent ils organs da la fundaziun duain garantir che las fundaziuns disponian da structuras professiunalas e che las cumpetenzas ch'èn indispensablas per ina gestiun strategica ed operativa effectiva ed effizienta da la fundaziun sajan represchentadas en la suprastanza.
• Il chantun po pajar contribuziuns a las regiuns da provediment da la sanadad a favur da projects per la constituziun da la fundaziun e per la surdada da la gestiun strategica ed operativa dals ospitals, da las chasas da persunas attempadas e da tgira e dals servetschs da spitex tras ils purtaders respectivs a la fundaziun.

Cumenzament: 30 da schaner 2019

Termin final: 30 d'avrigl 2019