Zum Seiteninhalt

Integraziun da fugitivas e fugitivs renconuschids e da persunas admessas provisoricamain en il chantun Grischun

 

En il chantun Grischun è il post spezialisà per l'integraziun cumpetent per l'integraziun linguistica e professiunala da fugitivas e fugitivs renconuschids e da persunas admessas provisoricamain.

Per promover il meglier pussaivel l'integraziun da questa gruppa da persunas ha la regenza grischuna deliberà ils 20 da matg 2009 in concept d'integraziun correspundent. Quest concept dat las directivas per fixar e per finanziar emprimas mesiras en il rom dal process d'integraziun e sa basa sin ils suandants princips:

  • Las mesiras d'integraziun vegnan realisadas directamain suenter la renconuschientscha sco fugitiva u sco fugitiv ubain suenter l'ordinaziun d'ina admissiun provisorica.
  • Il basegn d'integraziun vegn eruì en il rom d'ina analisa da la situaziun e cumpiglia ils suandants elements:
    >>scleriment da las enconuschientschas linguisticas e fixaziun dal basegn correspundent d'ina promoziun da linguas per cuntanscher il nivel A2 resp. il nivel B1 tenor la norma europeica communabla NEC
    >>scleriment da la pussaivladad da vegnir intermedià resp. dals impediments per ina integraziun professiunala (problems da la sanadad, incumbensas d'assistenza e.u.v.)
    >>scleriment da las cumpetenzas da scola e da la professiun (furmaziun scolastica, scolaziun, experientscha professiunala e.u.v.) areguard in'activitad da gudogn e fixaziun d'in eventual basegn da promoziun
  • I vegnan messas a disposiziun purschidas per l'acquisiziun da la lingua e per l'integraziun sociala sco er en vista ad in cumenzament d'ina activitad da gudogn. Questas purschidas èn specificas per la gruppa prendida en mira e s'orienteschan al basegn.
  • L'assegnaziun a las purschidas d'integraziun vegn fatga en moda individuala ed orientada ad ina finamira ed è lianta.
  • L'integraziun linguistica vegn coordinada d'ina experta u d'in expert che controllescha regularmain las fixaziuns da las finamiras ed ils progress d'emprender. L'integraziun professiunala vegn accumpagnada e sustegnida da jobcoachs che acquireschan sco "avraportas" activamain plazzas.

Infurmaziuns detagliadas davart ils temas da la migraziun e da l'asil stattan a disposiziun sin la pagina d'internet da l'uffizi federal da migraziun www.sem.admin.ch Decleraziuns davart ils differents status da dretg da fugitivas e fugitivs renconuschids, da fugitivas e fugitivs admess provisoricamain sco er da persunas admessas provisoricamain porscha l'organisaziun svizra d'agid als fugitivs sut www.fluechtlingshilfe.ch

Statisticas: dumber da las renconuschientschas novas da fugitivas e fugitivs e da persunas admessas provisoricamain en il Grischun