Cuntegn da la pagina

Persunas minorennas betg accumpagnadas

Umans en fugia ch'inoltreschan ina dumonda d'asil en Svizra, vegnan attribuids tenor ina clav da repartiziun als chantuns per la durada da la procedura d'asil. Tranter ils requirents d'asil attribuids sa chattan pli e pli er persunas minorennas betg accumpagnadas.

Tenor la convenziun davart ils dretgs da l'uffant da las Naziuns unidas èn las persunas minorennas betg accumpagnadas suttamessas ad ina protecziun speziala ed han il dretg da protecziun, d'assistenza, d'accumpagnament e d'integraziun. La finanziaziun dals custs persuenter sa drizza tenor ils princips da la pauschala globala pajada da la confederaziun.

Da princip han tut ils uffants en la vegliadetgna ch'els èn obligads d'ir a scola il dretg d'ina instrucziun gratuita da la scola elementara (constituziun federala da la confederaziun svizra dals 18 d'avrigl 1999, Cst.; CS 101) ed er las purschidas da furmaziun postobligatoricas stattan avertas a tut ils giuvenils – independentamain da la naziunalitad e dal status da dimora –, sch'els han absolvì il temp da scola obligatoric en Svizra u sch'els disponan da las pretensiuns correspundentas en il sectur da la lingua e da las cumpetenzas da basa.

Suenter l'arrivada en il chantun vegn pia fatg tar tut las persunas minorennas betg accumpagnadas – independentamain dal stadi da la procedura – in scleriment areguard la furmaziun scolastica. Per quest intent vegni distinguì tranter minorens obligads d'ir a scola e minorens betg pli obligads d'ir a scola. Tenor las experientschas da fin ussa arriva la pli gronda part da las persunas minorennas betg accumpagnadas en la vegliadetgna da 15 e da 18 onns en Svizra e n'è pia betg pli suttamessa a l'obligaziun d'ir a scola. Per promover l'autonomia e per rinforzar ina moda da viver independenta dovri – independentamain dal status da dimora – structuras dal di stabilisantas che resguardan la vegliadetgna sco er la garanzia da purschidas per amplifitgar las cumpetenzas scolasticas e persunalas e per sviluppar ina perspectiva correspundenta.

En vista ad ina integraziun persistenta che garantescha la basa finanziala d'existenza èsi impurtant d'enconuscher uschè baud sco pussaivel ils basegns d'integraziun da las persunas minorennas betg accumpagnadas e d'iniziar mesiras per promover il process d'integraziun en il sectur da la lingua, da la furmaziun e da las perspectivas professiunalas. En quest connex datti dapi il favrer 2015 en la scola S. Catarina a Cazas ina purschida da furmaziun specifica per las persunas minorennas betg accumpagnadas betg obligadas d'ir a scola, che metta ils accents sin la promoziun linguistica, la matematica e las cumpetenzas socialas e persunalas. Questa purschida ha la finamira da laschar acquistar e sviluppar enconuschientschas fundamentalas per il mintgadi ed – en cas d'ina dimora pli lunga – da garantir l'access al sistem da la furmaziun professiunala, q.v.d. frequentar ina soluziun transitorica resp. absolver ina furmaziun fundamentala professiunala, saja quai ina furmaziun fundamentala professiunala da 2 onns cun attest federal da furmaziun professiunala (AFP) u ina furmaziun fundamentala professiunala da 3 fin 4 onns cun attest federal da qualificaziun (AFQ).