Cuntegn da la pagina

Vischnancas

L'integraziun capita là, nua che umans vivan e lavuran ensemen. Perquai stat la vischnanca en il center d'ina politica chantunala d'integraziun che ha success. Ella surpiglia ina rolla impurtanta tar l'integraziun da sia populaziun residenta estra. Per integrar las vischnancas confurm als basegns ed en moda adattada sco er per garantir ina collavuraziun tranter las vischnancas e cun il chantun ha il post spezialisà per l'integraziun en mintga vischnanca in post da contact per dumondas da l'integraziun. Plinavant organisescha el regularmain scuntradas d'infurmaziun e da barat cun quests posts da contact communals. Las infurmaziuns da questa pagina vegnan publitgadas en l'internet en il decurs da la stad 2014.

Realisaziun "Pachet da bainvegni per persunas novarrivadas"

Per che las migrantas ed ils migrants possian dumagnar uschè svelt sco pussaivel ed independentamain lur mintgadi al nov lieu da domicil, dovran els infurmaziuns davart la vita e davart il lavurar sco er davart las purschidas d'integraziun. Uschia è l'infurmaziun – sper la cumpetenza linguistica – ina clav impurtanta per ina integraziun cun success. Correspundentamain cuntegna er il program chantunal d'integraziun PCI 2014-2017 deliberà da la regenza la finamira, tenor la quala tut las persunas che sa chasan da nov en ina vischnanca e che possedan il dretg da dimora per in temp pli lung èn infurmadas davart las cundiziuns da viver sco er davart las purschidas d'integraziun las pli impurtantas.

En vista a questa finamira èn vegnidas rimnadas experientschas durant in project da pilot da 2 onns en las vischnancas da Puntraschigna, Tavau e Tusaun e cun la corporaziun da vischnancas Pro Engiadina bassa davart las differentas furmas d'intermediar infurmaziuns a persunas novarrivadas. Las enconuschientschas da quest project da pilot èn vegnidas elavuradas en il "Pachet da bainvegni per persunas novarrivadas" ch'è descrit detagliadamain en la toolbox per las vischnancas concernent l'integraziun. En in proxim pass duai quest "pachet da bainvegni" vegnir realisà en las vischnancas pli grondas dal Grischun.

Toolbox per las vischnancas concernent l'integraziun

La situaziun da partenza per la promoziun da l'integraziun e las sfidas colliadas cun tala èn differentas da vischnanca a vischnanca tut tenor la situaziun geografica, la grondezza e la cumposiziun da la populaziun e pretendan in agir individual. Per sustegnair las vischnancas en lur incumbensas d'integraziun e d'infurmaziun ha il post spezialisà per l'integraziun cumpilà ina toolbox concernent l'integraziun. Cun questa toolbox concernent l'integraziun vegn preschentada ina paletta da purschidas e d'activitads, cun las qualas las vischnancas pon promover sistematicamain e confurm als basegns l'integraziun da la populaziun residenta estra, drizzond il focus sin ils suandants secturs: communicaziun e chapientscha, infurmaziun ed emprima infurmaziun en las vischnancas, persunas impurtantas, curs da lingua per persunas creschidas e promoziun tempriva, integraziun sociala, posts communals da contact.

Broschura "Toolbox per las vischnancas concernent l'integraziun"

Fegls d'infurmaziun

Formular da dumonda per confinanziar translaziuns da material d'infurmaziun communal

Fegl d'infurmaziun per l'engaschament da persunas decisivas en las vischnancas