Per uffants vali a partir dal proxim glindesdi, ils 11 d'avust 2025, per traversar la via puspè: spetgar, guardar, tadlar, chaminar. Millis d'uffants fan per l'emprima giada la via da scola u da scolina. La Polizia chantunala dal Grischun vegn puspè a rinforzar sia preschientscha en la vischinanza da las scolinas e da las chasas da scola.

Per uffants vala per traversar la via: spetgar, guardar, tadlar, chaminar. Ma tge vala atgnamain per persunas creschidas al guvernagl? La nova regla naziunala «Guardar | franar | tegnair» resumescha curt e bain ils tips da cumportament ils pli impurtants en il traffic sin via e gida ad evitar accidents cun uffants. La Polizia chantunala dal Grischun sustegna ina nova campagna per vias da scola segiras dal TCS per incumbensa dal Fond svizzer per la segirezza stradala (FSS).

Prendai er Vus part
Nus sustegnain la nova regla per las persunas creschidas che participeschan al traffic. La regla resumescha ils trais tips ils pli impurtants da cumportament per evitar accidents cun uffants. Gidai er Vus a render enconuschent la regla ed a far la via da scola pli segira:

• Guardar – Tgi che na sa lascha betg distrair e guarda sin la via, vesa uffants a temp. Gist en quartiers d'abitar ed en la vischinanza da scolas è l'attenziun cumplaina spezialmain impurtanta.
• Franar – En lieus nunsurvesaivels u sin vias pauc frequentadas vegnan ils uffants surprais pli savens d'autos, da motos u da velos, perquai ch'els percepeschan savens memia tard ils vehichels. Gia ina pitschna reducziun da la sveltezza gida a reagir a temp, sch'in uffant passa sin la via senza ponderar.
• Tegnair – uffants na san anc betg valitar bain las sveltezzas. Perquai emprendan els da chaminar pir, cura che las rodas na sa movan betg pli. Ils uffants duain decider sezs, cura ch'els chaminan. Desisti da dar segns dad ir sur la via.

Dapli preschientscha da la polizia al cumenzament da la scola
Per segirar las vias da scola e per proteger las pli giuvnas participantas ed ils pli giuvens participants dal traffic, vegn la Polizia chantunala dal Grischun a far dapli controllas da sveltezza e survegliar las vias da scola en las vischnancas. Parallelamain visitan ils instructurs da traffic da la Polizia chantunala dal Grischun tut las scolinas e mussan als uffants, co ch'els ston sa cuntegnair per traversar la via.