Dumondas e respostas davart il ePortal
Tge avantatgs ha il ePortal per mai sco utilisadra u utilisader?
Il ePortal Grischun (eportal.gr.ch) è ina plattafurma digitala per la populaziun e per l'economia. El permetta in access simpel a servetschs administrativs digitals.
Tge servetschs chat jau sin il ePortal?
La purschida da prestaziuns dal chantun Grischun per la populaziun e per l'economia cumpiglia oz plirs tschient servetschs, blers da quels anc sin palpiri. Pass per pass vegnan els digitalisads ed adempleschan uschia las autas pretensiuns da segirezza e da la protecziun da datas. La purschida da servetschs sin il ePortal vegn cumplettada cuntinuadamain.
Il servetsch che jau vi utilisar mussa in simbol da marschlos. Tge stoss jau far per utilisar il servetsch?
Per utilisar ils servetschs ch'èn marcads cun in simbol da marschlos duvrais Vus in Login. Vus stuais avrir in eConto, cura che Vus utilisais l'emprima giada in tal servetsch.
Quant facil èsi d'utilisar il ePortal?
L'administraziun chantunala dal Grischun s'engascha per garantir a las persunas cun impediments l'access senza barrieras al spazi digital. L'utilisaziun pratica per tut las utilisadras ed ils utilisaders vegn meglierada cuntinuadamain. L'administraziun chantunala s'orientescha en quest connex als standards internaziunals correspundents per cuntegns d'internet senza barrieras (tenor WCAG 2.1).
Jau hai ina dumonda davart il ePortal. A tgi poss jau ma drizzar?
Vus pudais ubain far ina dumonda da support sur il formular ubain contactar il support da tuttas uras per telefon sut il numer 081 553 35 55.
Nua chat jau dapli infurmaziuns davart il tema Administraziun digitala?
Sin nossa pagina d'internet chattais Vus ulteriuras infurmaziuns davart l'activitad da l'administraziun chantunala en connex cun la digitalisaziun e la transfurmaziun digitala.
www.digitaleverwaltung.gr.ch
Quant bain èn mias datas protegidas?
Il ePortal ademplescha auts standards da segirezza ed ha lieus d'arcunaziun segirs. Per l'administraziun chantunala dal Grischun è la protecziun da las datas persunalas d'ina impurtanza centrala. Nus dumandain uschè paucas datas sco pussaivel e duvrain mo quellas datas ch'èn er effectivamain necessarias per in tschert servetsch.
Nus controllain, quant bain che Vossas datas ston vegnir protegidas e faschain – en cas da basegn – in concept da segirezza. Expertas ed experts fan cuntinuadamain tests, sch'ils servetschs digitals e l'infrastructura dad IT han flaivlezzas, quai per garantir, che nagin n'haja nunautorisadamain access a Vossas datas.
La gronda part dals servetschs digitals vegn arcunada entaifer l'administraziun chantunala dal Grischun. Singuls servetschs vegnan furnids da purschiders externs; cun quels ha l'administraziun chantunala dal Grischun fatg cunvegnas contractualas che garanteschan in aut standard da la protecziun da datas.