Tge avantatgs hai jau, sche jau avrel in eConto?
Sche Vus avris in eConto, pudais Vus utilisar servetschs che premettan tschertas indicaziuns persunalas u che pretendan in pli aut stgalim da confidenza. Las persunalias ch'èn arcunadas en Voss profil, vegnan – sche pussaivel – surpigliadas automaticamain per ils singuls servetschs. Ultra da quai survegnis Vus, cun il eConto, ina chascha da brevs digitala.
Las funcziunalitads vegnan extendidas cuntinuadamain.
Ston ins pajar insatge per il eConto?
Na, Vus pudais avrir gratuitamain in eConto.
Tscherts servetschs pudais Vus dentant utilisar – sco gia oz al spurtegl – er en il spazi digital mo cun pajar ina taxa.
Dovri per tut ils servetschs en mintga cas in eConto?
Na. Ina gronda part dals servetschs è utilisabla senza in eConto. Per utilisar ils servetschs ch'èn marcads cun in simbol da marschlos stuais Vus As registrar. Quai, perquai che l'utilisaziun da quests servetschs premetta tschertas indicaziuns persunalas u pretenda in pli aut stgalim da confidenza.
Co poss jau avrir in eConto?
Per avrir Voss eConto pudais Vus tscherner in num d'utilisaziun. Ils champs obligatorics èn: num uffizial (sco en il passaport u sin la carta d'identitad), adressa dad e-mail, data da naschientscha, num d'utilisaziun e pled-clav, numer da telefonin.
Resguardai er: Tge dovr jau per l'autentificaziun da dus facturs?
Co poss jau laschar bloccar mes eConto?
Sche Vus vulais laschar bloccar Voss eConto, As drizzai per plaschair a noss support.
Vus pudais ubain far ina dumonda da support sur il formular ubain contactar il support da tuttas uras per telefon sut il numer 081 553 35 55.
Tge fatsch jau, sche mes eConto è vegnì bloccà?
Sche Voss eConto è vegnì bloccà da l'administraziun chantunala, survegnis Vus ina infurmaziun correspundenta per e-mail. En il e-mail chattais Vus in link al formular per debloccar il eConto. Sche Vus emplenis ed inoltrais quest formular, prenda l'administraziun chantunala si contact cun Vus.
Co poss jau stizzar mes eConto?
Vus pudais stizzar Voss eConto da tut temp sin il ePortal. Giai sin Voss profil d'utilisaziun sin «Stizzar il eConto» e confermai la procedura. Il giavisch vegn arcunà ed il eConto vegn stizzà entaifer paucs dis.
Tge capita cun mias datas en il eConto ed en la chascha da brevs digitala, sche jau stiz mes eConto
Las infurmaziuns en Voss eConto ed en Vossa chascha da brevs digitala vegnan stizzadas.
Tge avantatg ha la chascha da brevs digitala?
L'administraziun chantunala po trametter documents sin via digitala a las utilisadras ed als utilisaders.
Tge dovr jau per l'autentificaziun da dus facturs?
Il eConto pretenda in'autentificaziun da dus facturs. Per avrir in eConto duvrais Vus l'access a Voss conto dad e-mail ed als messadis SMS da Voss telefonin, per che Vus possias survegnir ed endatar ils codes da conferma. Suenter pudais Vus tscherner sez en Voss eConto sut «Meds d'autentificaziun», sche Vus vulais duvrar per logins futurs in'adressa dad e-mail, il numer da telefonin u in'app d'autentificaziun sco segund factur.
Dovr jau la SwissID per avrir in eConto?
Na, la SwissID n'è betg ina premissa obligatorica. Sche Vus vulais avrir in eConto ed avais gia ina SwissID, pudais Vus tscherner «SwissID» en la mascra d'annunzia. Suenter pudais Vus avrir il eConto.
Quant bain èn mias datas protegidas?
Il ePortal ademplescha auts standards da segirezza ed ha lieus d'arcunaziun segirs. Per l'administraziun chantunala dal Grischun è la protecziun da las datas persunalas d'ina impurtanza centrala. Nus dumandain uschè paucas datas sco pussaivel e duvrain mo quellas datas ch'èn er effectivamain necessarias per in tschert servetsch.
Nus controllain, quant bain che Vossas datas ston vegnir protegidas e faschain – en cas da basegn – in concept da segirezza. Expertas ed experts fan cuntinuadamain tests, sch'ils servetschs digitals e l'infrastructura dad IT han flaivlezzas, quai per garantir, che nagin n'haja nunautorisadamain access a Vossas datas.
La gronda part dals servetschs digitals vegn arcunada entaifer l'administraziun chantunala dal Grischun. Singuls servetschs vegnan furnids da purschiders externs; cun quels ha l'administraziun chantunala dal Grischun fatg cunvegnas contractualas che garanteschan in aut standard da la protecziun da datas.
En il eConto datti trais differents stgalims da confidenza. Tge exact è manegià cun quai? Per tge intent dovrel jau quels?
Tut tenor tge servetsch che Vus vulais utilisar, duvrais Vus in eConto. Per quest intent pudais Vus cuntanscher trais differents stgalims da confidenza.
Il stgalim da confidenza il pli bass è la registraziun. Per quella èn necessarias in pèr indicaziuns davart Vossa persuna ed in'autentificaziun da dus facturs. Il stgalim da confidenza mesaun è l'identificaziun per video. Per quella duvrais Vus in document d'identitad valaivel (p.ex. la carta d'identitad u il passaport) e Voss telefonin, per pudair far ina registraziun da video da Vossa fatscha. Per cuntanscher il stgalim da confidenza suprem, dovri l'indicaziun da Voss numer AVS. Quel vegn cumpareglià cun il Register naziunal da la AVS.
Uschia obtegnais Vus l'identitad electronica resistenta, ed uschia ina cumprova d'identitad segira en il spazi digital da l'administraziun chantunala dal Grischun.
Tge è l'identitad electronica resistenta e co survegn jau quella?
L'identitad electronica resistenta è ina cumprova d'identitad segira en il spazi digital da l'administraziun chantunala dal Grischun. Tut tenor tge servetsch che Vus vulais utilisar, duvrais Vus questa cumprova d'identitad. Uschespert che Vus selecziunais in tal servetsch, vegnis Vus manads correspundentamain tras la controlla d'identitad. Sche Vus avais gia l'identitad electronica resistenta, pudais Vus utilisar directamain il servetsch respectiv.
Tge è la differenza tranter la e-ID dal stadi e l'identitad electronica resistenta dal chantun Grischun?
L'identitad electronica resistenta cun agid dal eConto vegn duvrada per utilisar ils servetschs digitals che vegnan purschids sin il ePortal da l'administraziun chantunala dal Grischun. Ella po plinavant vegnir utilisada per servetschs da vischnancas che vegnan purschids entaifer il chantun Grischun.
Pli tard vegn la Confederaziun a metter a disposiziun la e-ID. Questa identitad electronica renconuschida dal stadi vegn a permetter da cumprovar cun vigur legala l'identitad en il spazi digital. Ella vegn emessa da la Confederaziun e vegn ad esser valaivla en l'entira Svizra.
Tge documents d'identitad vegnan acceptads?
Ils documents d'identitad valaivels èn il passaport svizzer, la carta d'identitad svizra ed auters documents d'identitad tenor la glista da pajais.
Tge fatsch jau, sche la fotografia da mes document d'identitad na funcziuna betg?
Sche Vus avais in problem cun fotografar Voss document d'identitad, faschai attenziun ch'in det u objects na cuvrian betg il document en il sectur marcà.
Controllai, che naginas glischs u reflecziuns na disturbian la fotografia, e che Voss document d'identitad saja net e bain legibel.
Muventai Voss document durant fotografar in pau enavant ed enavos e faschai attenziun che Vus hajas prendì la vart correcta (vart davant resp. vart davos) dal document.
Sch'i na funcziuna tuttina betg da far la fotografia, contactai noss support. Vus pudais ubain far ina dumonda da support sur il formular ubain contactar il support da tuttas uras per telefon sut il numer 081 553 35 55.
Tge fatsch jau, sche l'identificaziun per video na funcziuna betg?
Sche Vus avais problems cun l'identificaziun per video, controllai, che Vus hajas avunda glisch d'ambient ed empruvai d'evitar moviments svelts.
Faschai attenziun da na purtar nagins accessoris che cuvran la fatscha (p.ex. egliers da sulegl, cuvridas-chau, uregliers). Controllai en Voss eConto Vossas datas persunalas, sco il num e la data da naschientscha. Il prenum ed il num da famiglia ston vegnir endatads cumplettamain ed en la medema scripziun sco sin il document d'identitad.
Sche l'identificaziun na funcziuna tuttina betg, contactai noss support. Vus pudais ubain far ina dumonda da support sur il formular ubain contactar il support da tuttas uras per telefon sut il numer 081 553 35 55.
Tge fatsch jau, sche la controlla dal numer AVS na funcziuna betg?
Sche Vus avais problems cun la controlla da Voss numer AVS, controllai che Vus hajas endatà correctamain il numer. El sto avair 13 cifras e cumenzar cun la retscha da cifras 756.
Sche la controlla na funcziunass tuttina betg, contactai noss support. Vus pudais ubain far ina dumonda da support sur il formular ubain contactar il support da tuttas uras per telefon sut il numer 081 553 35 55.
A partir da tge vegliadetgna po vegnir creà in eConto?
In eConto po vegnir creà en mintga vegliadetgna. La gronda part da las fatschentas d'autoritads èn dentant pussaivlas pir cun 18 onns.
Quant ditg è in eConto valaivel?
In eConto n'ha nagina data da scadenza e resta valaivel uscheditg ch'el vegn utilisà. Sch'in eConto n'è betg vegnì duvrà durant 2 onns, vegn el deactivà. Suenter ulteriurs 2 onns senza far diever dad el vegn el stizzà.