Il 1. da schaner 2020 daventan la via dal Meir da Tusaun fin Casti e la via dal Güglia da Casti fin Silvaplauna – ch'eran fin ussa parts da la rait da vias principalas dal Grischun – da nov via naziunala (N29) en il senn da la lescha federala davart las vias naziunalas. Pervia dal standard da construcziun mantegna la via naziunala N29 dentant ses caracter sco via principala ed er la signalisaziun.

Sco nova proprietaria e patruna da construcziun maina e finanziescha la confederaziun a 100 pertschient la renovaziun, il mantegniment architectonic ed il manaschi da la via naziunala N29 sco er il mantegniment che na fa betg part d'in project. L'uffizi da construcziun bassa dal Grischun respectivamain l'unitad territoriala V (UT V) vegn a procurar er vinavant per il manaschi e per il mantegniment architectonic che na fa betg part d'in project. Quai per incumbensa da l'uffizi federal da vias (UVIAS) sin basa d'ina cunvegna da prestaziun.

Per incumbensa da la confederaziun e sin basa d'ina cunvegna da prestaziun exequescha la UT V gia dapi l'onn 2008 il manaschi da las vias naziunalas N13 ed N28 sco er il mantegniment architectonic che na fa betg part d'in project.

Ulteriuras infurmaziuns en l'actual Info UCB.

Via Beiva maina la via dal Güglia en l'Engiadin'ota