Navigation

Inhaltsbereich

Tenor l'art. 6 da la lescha federala davart vias e sendas da viandar (LVS) ston ils chantuns procurar che las vias e sendas da viandar vegnian construidas, signalisadas e mantegnidas. Per ch'il turissem da stad possia trair a niz en moda durabla las investiziuns communablas da var 13 milliuns francs che las vischnancas e ch'il chantun han fatg fin ussa per la signalisaziun dals var 11'000 km sendas da viandar, ston la qualitad e pia er il mantegniment da la signalisaziun sco er da las sendas sezzas esser garantids a lunga vista.

Per garantir in nivel da qualitad unitar en l'entir chantun èsi raschunaivel ch'ina organisaziun spezialisada fetschia la controlla dal stadi da las sendas en moda surordinada a maun d'in carnet d'obligaziuns specific. Tenor l'art. 32 da l'ordinaziun davart las vias (OVias) è Wanderwege Graubünden (WWGR) l'organisaziun spezialisada dal chantun per las sendas da viandar. Cun ses conclus nr. 1727 dals 16 da december 2008 ha la regenza exprimì sia intenziun d'incumbensar WWGR – tras ina cunvegna da prestaziun – cun la controlla dal stadi da la rait da sendas. Las manadras ed ils manaders da district decentrals WWGR èn en cas da percurrer la primavaira la rait da sendas cun paucs custs, da reparar donns pli pitschens e d'annunziar donns pli gronds a las vischnancas cumpetentas, per che quellas reparian quests donns.

Ils custs da la controlla surordinada dal stadi da las sendas che vegn fatga tras WWGR vegnan surpigliads dal chantun. Ils custs da mantegniment sco tals tenor l'art. 58 da la lescha davart las vias (LVias) vegnan surpigliads da las vischnancas; il mantegniment da la valur da la signalisaziun tenor ils art. 31 e 32 OVias vegn dentant subvenziunà per 50 pertschient tras il chantun.