Navigation

Inhaltsbereich

Dapi il cumenzament dal turissem è il Grischun ina da las destinaziuns da vacanzas las pli popularas da la Svizra. Per augmentar la cumpetitivitad dal chantun Grischun e la creaziun da valurs turisticas ha il chantun elavurà il concept graubündenHIKE en collavuraziun cun in biro da turissem. En la consultaziun tar ils uffizis e tar ils furniturs da prestaziuns turisticas ha il concept chattà vast consentiment.

L'atun 2014 ha la Regenza approvà il project ed incumbensà il Post spezialisà per il traffic betg motorisà da realisar quel en collavuraziun cun ils furniturs da prestaziuns turisticas en il chantun. Dapi la primavaira 2015 vegn el realisà. Il project è concepì per 4 onns. Ils custs totals èn budgetads cun 3,2 milliuns francs, dals quals surpiglian il chantun e la Confederaziun ina mesadad. L'autra mesadad duai vegnir furnida tras atgnas prestaziuns dals partenaris dal project cun elavurar las mesiras.

Il concept graubündenHIKE prevesa tut en tut 33 mesiras per meglierar las cundiziuns generalas dal turissem da viandar. Quellas sa repartan sin otg secturs tematics:

  • rait da vias ed infrastructura
  • transport
  • alloschament e hotels
  • guids
  • purschida e servetschs
  • cultura da viandar locala
  • events
  • organisaziun e colliaziun en ina rait

graubündenHIKE finamira 

Las mesiras elavuradas vegnan documentadas en moda cumplessiva per ch'ils resultats dal project possian vegnir duvrads persistentamain da tut ils acturs dal turissem da viandar.

Agids da lavur, fegls d'infurmaziun ed ulteriurs documents che resultan da graubündenHIKE, vegnan a star a disposiziun adina puspè en il Manual davart il traffic betg motorisà.