Navigation

Inhaltsbereich

Il coronavirus nov è fitg contagius e po manar tar grevs decurs da la malsogna sco era tar mortoris. Ina vaccinaziun na reducescha perquai betg mo il burdi da la malsogna e protegia qua tras la sanadad publica. Era las negativas consequenzas socialas ed economicas da la pandemia pon uschia vegnir sminuidas.

  • La vaccinaziun da rinfrestgament vegn recumandada a tut las persunas spezialmain periclitadas. Tut las autras persunas a partir da 16 onns pon era survegnir ina vaccinaziun da rinfrestgament, oravant tut persunas spezialisadas dal sectur da sanadad e persunas che assistan persunas spezialmain periclitadas.
  • L’annunzia succeda online
  • Persunas senza access a l’internet pon s’annunziar per telefon directamain tar il center da vaccinaziun.

s'annunziar qua

 

Infurmaziuns en las linguas da la populaziun da migraziun
Per migrantas e migrants da la Svizra metta l’UFSP a disposiziun infurmaziuns en diversas linguas.

La vaccinaziun

  • reducescha grevs decurs da COVID-19 e consequenzas a lunga durada (Long-COVID);
  • reducescha il privel da mutaziuns dal virus cun la furmaziun da novas variantas;
  • distgargia uschia il sectur da la sanadad.

Tge avantatgs ha ina vaccinaziun da rinfrestgament l’atun 2022?

Tenor las enconuschientschas actualas meglierescha in’ulteriura vaccinaziun da rinfrestgament almain temporarmain la protecziun individuala encunter malsognas cun in grev decurs, oravant tut tar persunas spezialmain periclitadas. La vaccinaziun impedescha minimalmain l’infecziun cun il virus e dat ina pitschna protecziun da malsognas cun in decurs miaivel.

Tge succeda sche jau hai gia gì ina vaccinaziun da rinfrestgament durant la stad: Stoss jau ma laschar vaccinar anc ina giada l’atun?

A persunas spezialmain periclitadas che han survegnì ina vaccinaziun da rinfrestgament la stad, vegn recumandà da puspè vaccinar l’atun. Ina tala è dentant recumandada pir suenter in interval da quatter mais suenter ina vaccinaziun u suenter ina guariziun.

È il vaccin bivalent adattà meglier che quel monovalent dad enfin ussa?

Tenor las enconuschientschas actualas èsi da presumar che domaduas generaziuns dals vaccins porschan ina protecziun cumparegliabla encunter malsognas cun grevs decurs. Ins suppona ch’il vaccin bivalent protegia meglier encunter infecziuns cun las sutvariantas actualas BA.5 dad Omicron, oravant tut cunter quellas che han in decurs miaivel.

Sun jau protegì meglier encunter malsognas post-Covid-19 (Long Covid), sche jau ma lasch vaccinar?

Blers studis mussan ch’il ristg per ina malsogna da post-Covid-19 sa reducescha considerablamain (da maniera signifitganta) cun ina vaccinaziun. Ils studis na san dentant betg cumprovar da maniera evidenta ch’ina vaccinaziun è era effizienta sco terapia.

En il fratemp ha la gronda part dals umans ina tscherta immunitad. Tge vul quai dir?

Actualmain èsi da supponer che 97 pertschient da la populaziun ha ina tscherta immunitad da basa. Perquai che la gronda part dals umans en Svizra è ubain vaccinada ubain ch’ella ha gì ina infecziun, u omadus chaussas. Questa immunitad na po dentant betg evitar cumplettamain infecziuns. Tar persunas saunas enfin 65 onns è il ristg perquai fitg pitschen dad avair ina malsogna cun in grev decurs durant l’atun e l’enviern.

Mes certificat è scrudà. Stoss jau ma laschar vaccinar per survegnir in nov certificat?

Dapi il favrer 2022 na datti nagin certificat pli en Svizra. L’app “COVID Certificate” mussa da nov mo pli la data da la vaccinaziun u dal test. Tgi che fa viadis en auters pajais, sto vinavant s’infurmar sez davart las pretensiuns da tests, vaccinaziuns u l’attestaziun d’ina guariziun. Las pretensiuns e las reglas per in certificat pon esser differentas tut tenor il pajais. Viagiaturas e viagiaturs èn sezs responsabels da s’infurmar davart las disposiziuns d’entrada dal pajais da destinaziun.

Poss jau ma vaccinar al medem mument encunter la grippa e Covid-19?

Da principi san ins prender vaccins encunter la grippa avant, suenter u ensemen cun ina vaccinaziun encunter Covid-19. Tut questas cumbinaziuns èn segiras ord perspectiva medicinala. Ina vaccinaziun contemporana cun ils dus vaccins l’atun 2022 fa mo senn, sche l’interval optimal per domaduas vaccinaziuns correspundan.

Poss jau ma vaccinar al medem mument encunter la grippa e Covid-19?

Da principi san ins prender vaccins encunter la grippa avant, suenter u ensemen cun ina vaccinaziun encunter Covid-19. Tut questas cumbinaziuns èn segiras ord perspectiva medicinala. Ina vaccinaziun contemporana cun ils dus vaccins l’atun 2022 fa mo senn, sche l’interval optimal per domaduas vaccinaziuns correspundan.

Co funcziuna la vaccinaziun?

La vaccinaziun cunter COVID-19 permetta al corp da sviluppar ina defensiun immunitara che sa drizza spezialmain cunter il virus. Uschespert ch’il corp è exponì al virus, po el cumbatter quel ed evitar uschia ina greva malsogna. La vaccinaziun rinforza e trenescha pia noss sistem d’immunitad cunter il coronavirus, e quai en moda intenziunada.

Tge vaccin vegn recumandà?

Nus As recumandain da far la vaccinaziun da rinfrestgament cun preferenza cun in vaccin mRNA (bivalent) adattà a las variantas u cun il vaccin da protein da Novavax, sche quels èn disponibels, e quai independentamain dal vaccin utilisà per las vaccinaziuns precedentas. Per quai che reguarda ils vaccins mRNA (Pfizer/BioNTech u Moderna), èn adattads tant ils vaccins (monovalents) da fin ussa sco era in vaccin adattà a las variantas (bivalent) per la vaccinaziun da rinfrestgament da l’atun 2022. Datas actualas mussan ch’ils vaccins mRNA monovalents protegian era tar las novas variantas dad Omicron encunter in grev decurs cun ospitalisaziun. Impurtant: Dunnas en speranza u che tezzan lur uffants duain sa laschar vaccinar cun in vaccin mRNA (betg cun il vaccin da protein da Novavax).

A tgi vegn recumandada ina vaccinaziun da rinfrestgament l’atun 2022?

La vaccinaziun da rinfrestgament l’atun 2022 vegn recumandada urgentamain a tut las persunas spezialmain periclitadas:

  • persunas a partir da 65 onns
  • persunas a partir da 16 onns cun malsognas cronicas
  • persunas a partir da 16 onns cun trisomia 21
  • dunnas en speranza Era tut las autras persunas a partir da 16 onns pon sa laschar vaccinar l’atun 2022.

La fermezza da la recumandaziun variescha tenor la gruppa da populaziun.

Gruppa da populaziun Fermezza da la recumandaziun
Persunas spezialmain
periclitadas (PSP)
+++
auta
Persunal sanitar, persunas
che tgiran PSP

++
media

Tut las autras persunas
da 16 enfin 64 ons
(+)
basa

La vaccinaziun vegn recumandada era a tut las persunas che n’èn anc betg vaccinadas encunter Covid-19.

Nua poss jau ma laschar vaccinar?

En praticas da medis/medias da chasa, apotecas ed ospitals. Qua chattais Vus ina survista actuala dals centers da vaccinaziun.

Nua ma poss jau annunziar e co è il decurs?

  • Numerus posts da vaccinaziun porschan vaccinaziuns encunter Corona senza preannunzia (Walk-in)
  • Vaccinaziuns sin termin pon vegnir reservadas online.
  • Persunas senza access a l’internet pon s’annunziar per telefon directamain tar il post da vaccinaziun.

Tge stoss jau prender cun mai per la vaccinaziun?

Prendai per plaschair cun Vus al termin da vaccinaziun:

  • carta da l'assicuranza da malsauns
  • passaport, carta d'identitad u in auter document d'identitad uffizial
  • glista da diagnosas e/u da medicaments da la media u dal medi da chasa ubain da la media spezialisada u dal medi spezialisà
  • attest da vaccinaziun, sche avant maun 

Poss jau ma laschar vaccinar er tar mia media da chasa u tar mes medi da chasa?

Gea. Qua chattais Vus ina survista actuala dals centers da vaccinaziun en il chantun Grischun.

Poss jau era ma laschar vaccinar en l’apoteca?

Gea. Qua chattais Vus ina survista actuala dals centers da vaccinaziun en il chantun Grischun. 

Quant custa la vaccinaziun?

Ina vaccinaziun encunter Covid-19 recumandada è gratuita.

Co poss jau spustar il termin da vaccinaziun?

As drizzai per plaschair al center da vaccinaziun correspundent.

Cun tge effects secundars èsi da far quint?

Ils effects secundars documentads il pli savens en ils studis d'admissiun èn cumparegliabels cun ils effects che sa mussan suenter ina vaccinaziun cunter la grippa. Suenter la segunda dosa pon quests effects secundars dentant esser pli ferms.

A tgi che survegn sintoms pli ferms u nunusitads suenter ina vaccinaziun vegni recumandà da contactar il center da vaccinaziun, l'ospital, la media u il medi ubain l'apotecra u l'apotecher. 

Stoss jau ma laschar vaccinar?

Na, i n'exista nagina obligaziun da vaccinaziun. Mintga persuna duai decider sezza, sch'ella vul sa laschar vaccinar.

Jau sun guarì. Duess jau ma laschar vaccinar?

La vaccinaziun è era recumandada, sche Vus essas guarì. Nus As recumandain la vaccinaziun per che Vus sajas protegì meglier ed a lunga vista. Ina vaccinaziun è recumandada a partir da 4 mais suenter la malsogna.

Pertge duess jau ma laschar vaccinar?

La vaccinaziun As protegia d’in grev decurs da Covid-19. 

Jau sun en speranza u vuless vegnir en speranza. Duai/sai jau ma laschar vaccinar?

Gea. Nus As recumandain la vaccinaziun Covid-19 avant u durant la gravidanza. Perquai che grevs decurs da l’infecziun cun Covid-19 èn bler pli frequents tar dunnas en speranza che tar persunas da la medema vegliadetgna che n’èn betg en speranza. Plinavant è il ristg d’ina naschientscha prematura cleramain pli aut, sche Vus As infectais cun il coronavirus durant la gravidanza. La vaccinaziun avant u durant la gravidanza protegia Vus e l’uffant betg anc naschì.

Planisais Vus da vegnir en speranza? Alura As laschai vaccinar uschè spert sco pussaivel.

Essas Vus gia en speranza e n’avais anc survegnì nagina vaccinaziun avant la gravidanza?

Alura As recumandain nus la vaccinaziun a partir da l’emna 12 da la gravidanza (q.v.d. a partir dal segund terz da la gravidanza). Ideala è la vaccinaziun en il segund u en il terz terz da la gravidanza, cunquai ch’ils emprims trais mais èn la fasa la pli sensibla per il svilup fetal dals organs.

Sche Vus essas en speranza u planisais ina gravidanza ed avais dumondas pertutgant la vaccinaziun, consultai Vossa media/Voss medi u Vossa spendrera.

Pon dimorantas e dimorants temporars (p.ex. stagiunarias e stagiunaris) s’annunziar per la vaccinaziun da corona?

Lavurantas e lavurants da l’exteriur cun permissiun da dimora che vala main ditg che 3 mais (p.ex. stagiunaris) pon s’annunziar en il chantun Grischun per la vaccinaziun da corona. Per quai s’annunzian els sur la pagina-web www.gr.ch/impfen.
Lavurantas e lavurants da l’exteriur basegnan in numer d’assicuranza valaivel d’ina cassa da malsauns svizra u ina confermaziun (permissiun da dimora da la vischnanca u contract da lavur).

Pon dimorantas e dimorants temporars (p.ex. stagiunarias e stagiunaris) s’annunziar per la vaccinaziun da corona?

Lavurantas e lavurants da l’exteriur cun permissiun da dimora che vala main ditg che 3 mais (p.ex. stagiunaris) pon s’annunziar en il chantun Grischun per la vaccinaziun da corona. Per quai s’annunzian els sur la pagina-web www.gr.ch/impfen.
Lavurantas e lavurants da l’exteriur basegnan in numer d’assicuranza valaivel d’ina cassa da malsauns svizra u ina confermaziun (permissiun da dimora da la vischnanca u contract da lavur).

Pon uffants e giuvenils sa laschar vaccinar?

Per persunas sut 16 onns na vegn recumandada nagina vaccinaziun da rinfrestgament l’atun 2022, cun quai ch’il ristg per ina greva malsogna da Covid-19 è fitg bass tar giuvenils ed uffants. La pli gronda part dad uffants a partir da 5 onns e da giuvenils han gia anticorpuls encunter il coronavirus sin basa d’ina anteriura infecziun u vaccinaziun.

Ulteriuras infurmaziuns:

Vaccinaziun: Uschia ans protegin nus (UFSP)

Ulteriuras infurmaziuns davart la vaccinaziun (Uffizi federal da sanadad publica)

Infoline vaccinaziun cunter COVID-19 (Uffizi federal da sanadad publica): +41 58 463 00 00 (mintga di da las 08.00 fin las 18.00)