Tgira da dents per scolaras e scolars
Grazia a las controllas annualas gratuitas tras la dentista u il dentist da scola sco er grazia a l'instrucziun da profilaxa regulara han ins pudì reducir fermamain ils cas da caries tar ils uffants. La tgira da dents en scola presta pia ina contribuziun impurtanta a la promoziun da la sanadad, a la prevenziun da malsognas dals dents sco er a l'egualitad da las schanzas areguard la sanadad dals uffants.
Tenor l'Ordinaziun chantunala davart la tgira da dents en scola dals 3 da fanadur 2007 (DG 421.850) è la tgira da dents en scola da princip ina incumbensa da las vischnancas, quai cun l'intent da procurar per:
- mesiras per mantegnair la sanadad da la bucca (profilaxa)
- la controlla annuala dals dents (visita da controlla) ed il tractament
Mantegniment da la sanadad da la bucca tras l'instrucziun da profilaxa
En il chantun Grischun vegnan tut ils uffants da scolina e da scola ch'èn obligads d'ir a scola, instruids confurm a lur vegliadetgna. D'instructuras scoladas emprendan els da lavar endretg ils dents ed infurmaziuns davart in nutriment che schanegia ils dents. Supplementarmain fan las persunas d'instrucziun mintga quartal exercizis cun il barschun da dents.
L'instrucziun da profilaxa è reglada en las incaricas da prestaziun a la Societad grischuna da dentistas e dentists respectivamain a la citad da Cuira. Quellas cuntegnan la realisaziun da las mesiras per mantegnair la sanadad da la bucca (profilaxa cunter caries) en las scolinas ed en las scolas primaras dal chantun Grischun.
Links
Controllas annualas
A partir da la scolina vegnan tut ils uffants controllads ina giada per onn tras la dentista u il dentist da scola. En la citad da Cuira surpiglia la Clinica da dents per scolaras e scolars questa incumbensa. Ils custs portan las vischnancas. Igl è adina pussaivel da laschar far la controlla tras ina dentista u in dentist ch'ins tscherna sez. Per regla surpiglian alura ils geniturs sezs quests custs.