Giuvenils reageschan pli ferm che creschids sin alcohol, products da tubac e nicotin. In consum regular u smesirà modifitgescha il tscharvè dal giuvenil da maniera negativa e persistenta. Plinavant augmenta in consum tempriv il ristg d’ina malsogna da dependenza da pli tard. Giuvenils èn mirveglius, pli pronts per ristgas ed han damain experientscha che creschids. Per sustegnair in svilup uschè saun sco pussaivel, valan leschas da protecziun da la giuventetgna. La vendita e la consegna dad alcohol e products da tubac èn regladas suandantamain:

• Nagin alcohol e nagins products da tubac a giuvenils sut 16 onns
• Naginas spirituosas, aperitivs ed alcopops a giuvenils sut 18 onn

Per e-cigarettas na datti anc nagina regulaziun giuridica. Cun la nova lescha naziunala per products da tubac che entra en vigur probablamain la mesadad 2024 vegn quella largia serrada. L’Uffizi da sanadad porscha sustegn e cussegliaziun per vischnancas, per organisaturs e posts da vendita per resguardar las disposiziuns legalas da la protecziun da giuventetgna.


Cumpras da test dad alcohol e tubac
En il chantun Grischun èn las vischnancas responsablas da resguardar correctamain las disposiziuns da la protecziun da la giuventetgna en il sectur da l’alcohol e dal tubac. Cun cumpras da test da monitoring gratuitas As sustegna l’Uffizi da sanadad per far valair las leschas da protecziun da la giuventetgna. Mussavia: Cumpras da test dad alcohol e products da tubac (tudestg). En cas d’interess As annunziai tar Kevin Meier.

Scolaziuns per la protecziun da la giuventetgna
L’Uffizi da sanadad porscha a vischnancas ed organisaturs scolaziuns gratuitas per il persunal da vendita e da service. La scolaziun intermediescha fatgs davart il consum d’alcohol e da tubac da giuvenils, davart disposiziuns legalas ed exempels concrets davart la vendita da las substanzas. En cas d’interess As annunziai tar Kevin Meier.

Jalk.ch –Scolaziun online
Ina scolaziun online davart il tema protecziun da la giuventetgna tar la vendita d’alcohol – per persunal da vendita e da service. Tar la scolaziun online (tudestg)

Jalk ID Scan app
Cun agid da l’app vegn il document d’identitad legì e la vegliadetgna da la persuna vegn inditgada. Tar l'app