È Vossa vischnanca en equiliber?
La stad 2024 dain nus ad emprest il percurs d'equiliber mobil a las vischnancas ed instituziuns. Uschia vulain nus rinforzar il stil da viver saun da la populaziun grischuna e motivar las vischnancas da concepir ils spazis da moviment e d'inscunter publics en ina moda attractiva.
Cun la crusch da ballantschar pon burgaisas e burgais da tut las vegliadetgnas metter a la prova lur coordinaziun e lur equiliber. Ultra da l'effect positiv per la sanadad, promovan spazis attractivs per sa mover er l'activitad ed il barat da giuven e vegl. Las vischnancas che vulan concepir spazis da moviment e d'inscunter attractivs, cussegliain e sustegnain nus finanzialmain.
Uschia funcziuna l'emprest
- Studegiar las infurmaziuns
- Emplenir la dumanda cun la data giavischada e l'inoltrar fin ils 31-03-24 a Romana.Sutter@san.gr.ch
- Coordinar ils detagls (p.ex. installaziun e demontascha, communicaziun, program accumpagnant e.u.v.)
- Realisaziun
- Evaluaziun (questiunari)
- Suenter avair utilisà la crusch da ballantschar paja la vischnanca il quint da 1880 francs a BeweGR (transport ed installaziun). La vischnanca u l'instituziun survegn enavos 1300 francs da l'Uffizi da sanadad.
La vischnanca resp. instituziun purtadra
- dispona d'in lieu adattà da 15 m x 15 m
metta a disposiziun ina persuna da contact per dumondas
- procura per la segirezza: controlla regulara da la crusch da ballantschar, annunzia da donns
- fa reclama per la purschida tar la populaziun locala
- evaluescha e dat in feedback a l'Uffizi da sanadad cun il questiunari respectiv
L'Uffizi da sanadad
- surpiglia 70 % dals custs totals
- organisescha il transport, l'installaziun e la demontascha
- cusseglia davart spazis da moviment e d'inscunter attractivs
- metta a disposiziun in questiunari per l'evaluaziun
Activitads accumpagnantas
Per cuntanscher l'effect giavischà da la crusch da ballantschar èsi impurtant, che la populaziun vegnia infurmada en chaussa. L'effect il pli grond cuntanschan ins cun in'occurrenza da partenza, p.ex. en collavuraziun cun ina instituziun locala, sco in'uniun da gimnastica, in'uniun da dunnas u dad umens u la Pro Senectute. Dentant er ina communicaziun a las medias, placats, flyers, artitgels en newsletters u infurmaziuns en las medias socialas e sin las paginas d'internet èn acziuns utilas.
La crusch da ballantschar po er vegnir integrada sco attracziun supplementara en ina festa dal vitg u vegnir lantschada cun ina occurrenza d'impuls davart in tema da la promoziun da la sanadad.
I vala la paina da far attent ils acturs locals che mettan en moviment la populaziun, a la crusch da ballantschar. Quai èn per exempel: gruppas da gieu, scolinas/scolas, uniuns da gimnastica, chasas da persunas attempadas, purschiders da curs da moviment e.u.v.
Segirezza
Durant la fasa da manaschi ha la gestiunaria la responsabladad. La crusch da ballantschar è vegnida controllada dal Swiss Safety Center (bfu) ed ademplescha la retscha da las normas europeicas DIN EN 1176 per urdains da plazzas da giugar.