Tecnica criminala
La tecnicra criminala u il tecnicher criminal segirescha ils indizis al lieu dal delict ed identifitgescha persunas. Collavuraturas e collavuraturs cun experientscha e cun interess per incumbensas tecnicas sustegnan cun ils meds tecnics ils pli moderns las retschertgas da tut ils servetschs polizials cun tschertgar indizis, segirar cumprovas, far documentaziuns fotograficas e valitaziuns.
Servetsch spezial 1 – Identificaziun
Las spezialistas ed ils spezialists dal servetsch spezial Identificaziun s'occupan dals secturs dactiloscopia, DNA, fastizs da chalzers, retschertga da datas da persunas sparidas sco er da persunas mortas. Ultra da quai èn els las persunas da contact en il sectur da servetschs d'identificaziun.
Servetsch spezial 2 – Foto e fastizs
Las spezialistas ed ils spezialists dal servetsch spezial Foto e fastizs retschertgan microfastizs (fibras da textilias, chavels, stgaglias da vernisch e.u.v.), examineschan l'autenticitad da documents d'identitad, cumpareglian fastizs vi da patronas e projectils gia sajettads. Plinavant èn els las persunas da contact en il sectur da la fotografia.
Servetsch spezial 3 – Tecnica
Las spezialistas ed ils spezialists dal servetsch spezial Tecnica cumpareglian fastizs d'armas cun pussaivels guaffens da delict e retschertgan segns imprimids allontanads. Plinavant èn els responsabels per metter traplas a delinquentas e delinquents. Ultra da quai evalueschan els datas da video.
Servetsch spezial 4 – Retschertga d'incendis
Las spezialistas ed ils spezialists dal servetsch da retschertga d'incendis n'elavuran ensemen cun la polizia da frunt betg mo ils incendis sin l'entir territori chantunal, mabain erueschan er motivs pussaivels per accidents da lavur. Quai pretenda ina chapientscha tecnica spezialmain buna. Plinavant èn els – sco servetsch spezialisà per material explosiv – l'instanza da permissiun en ils secturs dal material explosiv e dals objects pirotecnics. Ensemen cun auters posts spezialisads examineschan els eveniments en connex cun tals products.