Dapi l'onn 2018 utilisescha la Polizia chantunala dal Grischun minidronas. L'onn 2024 èn ellas vegnidas introducidas tar la Polizia da regiuns per registrar accidents. Ils onns 2018 fin 2024 èn vegnids realisads tut en tut var 600 sgols. 

Durant las acziuns na vegni betg lavurà en l'aria mo cun minidronas u mo cun in helicopter, mabain savens er cun tuts dus meds a medem temp. Per quest motiv dovri trenaments cuminaivels per betg sa disturbar en l'aria. A chaschun dals emprims exercizis cuminaivels han las duas gruppas emprendì ad enconuscher ils meds d'acziun da l'autra unitad e tge che sto vegnir observà stringentamain en connex cun la coordinaziun en il spazi d'aria.

Per la realisaziun pratica èn vegnidas tschertgadas trais persunas en la muntogna. Cun divider la zona en secturs èsi vegnì garantì che helicopters e minidronas han pudì lavurar senza disturbis en territoris da tschertga separads. I vegn numnadamain sutvalità ch'i n'è strusch pussaivel da vesair or dal helicopter minidronas en l'aria; ina clera communicaziun ed ina structuraziun da la procedura èn perquai indispensablas.

Las minidronas èn munidas tranter auter cun cameras termicas. En il cas da l'exercizi da tschertga menziunà en las muntognas èsi stà fitg difficil da chattar ina persuna. Suenter il debriefing sin la basa da helicopters a Tavanasa han tut ils participants pudì sa metter sin via a chasa cun bleras novas enconuschientschas.