Per renovar e per modernisar l'unifurma da moto, las giaccas èn da l'onn 2011, ha la gruppa da moto da la Polizia chantunala dal Grischun examinà en la pratica ils dus products ch'èn restads or da pliras variantas. Las polizistas ed ils polizists cun motos eran perquai en gir il settember 2022 sin las vias grischunas cun unifurmas anc nunusitadas.

Tuts dus products han ina tecnologia da laminat moderna cun pliras vettas, èn resistents a l'aua e laschan respirar. Las unifurmas èn munidas cun protecturs moderns e flexibels che cumpletteschan – ensemen cun las vestas cun airbag cumpradas l'onn 2021 – la segirezza da las motociclistas e dals motociclists.

Durant la fasa da test vegnan eruidas las opiniuns da las squadras da moto da nov corps da polizia. A maun da questas experientschas vegni decidì l'enviern 2022/23 davart il product final. La finamira è quella d'equipar las commembras ed ils commembers da la gruppa da moto cun la nova unifurma sin la stagiun 2023.